महिलालाई आत्मनिर्भर बनाउन जरुरी छ : मन्त्री रेग्मी
फरकधार / २८ भदौ, २०७९
फाइल फाेटाे

महिला, बालबालिका तथा ज्येष्ठ नागरिकमन्त्री उमा रेग्मीले महिलालाई आर्थिक रूपले आत्मनिर्भर बनाउन जरुरी रहेको बताएकी छन् ।



मंगलबार काठमाडौंको बूढानीलकण्ठमा निर्माण गरिएको समाज कल्याण परिषदको व्यावसायिक तालिम केन्द्र भवनको उद्घाटन गर्दै मन्त्री रेग्मीले सो कुरा बताएकी हुन् । त्यस अवसरमा उनले सो भवन महिलालाई आधारभूत तालिम दिई दक्ष बनाउन उपयोग हुने विश्वाससमेत व्यक्त गरिन् । 

मन्त्री रेग्मीले सो भवनलाई उद्देश्यमूलक ढंगले सञ्चालन गर्न समाज कल्याण परिषदका पदाधिकारीलाई निर्देशनसमेत दिइन् । 



उनले भने, ‘महिलालाई आत्मनिर्भर बनाउन जरुरी छ । यो तालिम केन्द्र पनि भाडामा लाग्ने छैन । यसले महिलालाई तालिम दिएर उपलब्धिमूलक बनाउने छ । यसका लागि आवश्यक सहयोग गर्न मन्त्रालय तयार छ ।’



मन्त्री रेग्मीले महिलाको दक्षता अभिवृद्धि गरी उनीहरूलाई उद्यमी बनाउने काममा मन्त्रालयले पनि सो तालिम केन्द्रलाई आवश्यक सहयोग गर्ने आश्वासनसमेत दिइन् ।

कतार च्यारिटीको सहयोगमा निर्माण गरिएको सो भवनमा ४ वटा तालिम कोठा, २ वटा अफिस कोठा, १ वटा सेमिनर हल र ८ वटा शौचालय रहेका छन् । 

त्यस अवसरमा महिलाको सिलाइकटाइ तालिमको पनि शुभारम्भ गरिएको थियो । महिलालाई आयआर्जनको काममा लगाउने उद्देश्यले सो तालिमको शुभारम्भ गरिएको समाज कल्याण परिषदले जनाएको छ । 

  • प्रकाशित मिति : भदौ २८, २०७९ मंगलबार १५:३३:३२,  

फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यो सामग्री सेयर गर्नुहोस्


यो पनि नछुटाउनुहोस्
मल्टिमिडिया