नेकपा एमालेका अध्यक्ष केपी शर्मा ओलीले चितवनमा टिक्न नसक्ने भएपछि माओवादी केन्द्रका अध्यक्ष पुष्पकमल दाहाल प्रचण्ड निर्वाचन लड्न गोरखा जानु परेको टिप्पणी गरेका छन् । अध्यक्ष ओलीले आफ्नै जिल्लामा निर्वाचन लड्न नसकेर गोरखा जाने दाहाललाई स्वदेश तथा विदेशमा रहने कुनै पनि नेपालीले साथ दिन नहुने तर्क समेत गरे ।

 प्रवासी नेपाली मञ्चको प्रथम अन्तर्राष्ट्रिय अधिवेशनको शनिबार काठमाडौंमा उद्घाटन गर्दै उनले दाहालले आफ्नै नेतृत्वमा चलाएको युद्धका कारण धेरै नेपालीले बेसहारा जीवन गुजार्नु परेको उल्लेख समेत गरे । सशस्त्र युद्धका कारण पीडामा परेकाहरूलाई बेवास्ता गरेर आफ्ना परिवार र आफन्तको हितमा मात्रै दाहाल लागि परेको ओलीको आरोप थियो । 

‘देशमा १७ हजार मानिस मारिए । बिधुवा छन् कति ? एकल छन् कति ? टुहुरा टुहुरी छन् कति ? बेसहारा बुबा, आमाहरू कति छन् कति ? सरिरमा गोली लिएर, अङ्गभङ्ग भएर ह्वील चियरमा लौरा टेकेर, बैशाकी टेकेर घसारिएर कोही हिँडेका छन् । कोही उठन सक्ने अवस्था छैन । उनीहरूले आवधिक रूपमा उपचार गराई रहनु परेको छ । अनेक पिटाइका कारणले, यातनाका कारणले अरू विभिन्न देशका इफेक्ट । तर, सञ्चालन गर्ने नेता, तिनका परिवार, तिनका आफन्त मैले भनिरहन परेन,’ कार्यक्रममा ओलीले भने, ‘त्यस्ताका पछाडि नेपाल भित्र मात्रै होइन, जो आफ्नै गाउँ चितवनमा टिक्न नसकेर भागेर गोरखा जान्छ । अव विदेशमा त्यस्ताका पछाडि लागेर संगठन बनाएर हुन्छ के ? त्यो भन्दा त बरु चुप लागेर सुति खेती गरेर खाए हुन्छ नि । विदेशमा जानु छ, प्रचण्डको संगठन बनाउनु छ । यो कुराबाट सचेत गराएर ती साथीभाइलाई उठाउने कसले ? त्यसबाट उन्मुक्ति दिने कसले ? यसको जिम्मा प्रवासी नेपाली मञ्चले लिनुपर्छ ।’

अध्यक्ष ओलीले आगामी निर्वाचनपछि एमाले एक्लैले बहुमतको सरकार बनाउने दाबी समेत दोहोर्‍याए । उनले सत्तारुढ गठबन्धनले आगामी निर्वाचनमा जनमत पाए लुटपाट सुरु हुने र देश कंगाल बन्ने जिकिर समेत गरे। अध्यक्ष ओलीले सत्तारुढ गठबन्धन मृत अवस्थामा पुगिसकेकाले यसले देशको, जनताको माया नगरेको समेत बताए ।