नेकपा (एमाले)का गुल्मीका पुराना एक नेताले नेकपा एकीकृत समाजवादीकी उम्मेदवार रामकुमारी झाँक्रीलाई सघाउने घोषणा गरेका छन् । एमाले लुम्बिनी प्रदेश कमिटी सदस्य शेषकान्त गौतमले सत्तारुढ गठबन्धनबाट उम्मेदवार बनेकी झाँक्रीलाई सघाउने घोषणा गरेका हुन् ।
आइतबार पत्रकार सम्मेलन गरेर उनले आगामी मंसिर ४ गते हुने प्रतिनिधिसभा निर्वाचनमा गुल्मीको क्षेत्र नम्बर २ मा सत्तारुढ गठबन्धनबाट साझा उम्मेदवार झाँक्रीलाई जिताउन सघाउने बताएका हुन् ।
उनले आफूले एमाले पार्टी नछाड्ने, तर पार्टीले कुनै कारबाही गरेमा त्यसको परिणाम भोग्न पनि तयार भएर याे निर्णय गरेकाे पत्रकार सम्मेलनमा बताए ।
गुल्मी क्षेत्र नम्बर २ मा नेकपा एमालेबाट पार्टी सचिव गाेकर्ण विष्ट उम्मेदवार छन् । उनी ०५६ सालदेखि ०६४ सालमा बाहेक पटक–पटक निर्वाचित भएका छन् ।
नेता गाैतमकाे निर्णयले विष्टलाई धक्का लाग्ने देखिन्छ । तर, नेकपा एमाले गुल्मीले भने गाैतमलाई पार्टीले करिब एक महिनाअघि नै कारबाहीको प्रक्रिया अगाडि बढाएको दाबी गरेकाे छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
