काठमाडौंको लिटिल एञ्जल्स् एजुकेसन ग्रुपले ‘शिक्षा क्षेत्रमा उत्कृष्ट शिक्षण सिकाइको पद्धति के हुन सक्छ ?’ भन्ने जिज्ञासाको जवाफ खोज्ने उदेश्यले विराटनगर तथा जनकपुरमा एक–एक दिने कार्यशाला गोष्ठीको आयोजना गरेको छ ।

मंगलबार काठमाडौं विश्वविद्यालयबाट सम्बन्धन प्राप्त लिटिल एञ्जल्स् कलेज अफ म्यानेजमेन्टले सामाजिक दायित्व अन्तर्गत शिक्षण सिकाइको उत्कृष्ट पद्धतिको खोजी गर्ने अभिप्रायले विराटनगरमा कार्यशाला गोष्ठीको आयोजना गरेको थियो । त्यस्तै यही गोष्ठी गत शनिबार जनकपुरधाममा पनि आयोजना गरिएको थियो ।

विराटनगरका मेरिल्याण्ड कलेज, अरनिको कलेज, नेशनल एकेडेमी, विराट मोडल कलेज, शिक्षादीप कलेज तथा ग्रीनल्याण्ड कलेजका शिक्षकहरुलाई समावेश गर्दै शिक्षण सिकाइको उत्कृष्ट पद्धतिका विषयमा गोष्ठीकै माध्यमबाट छलफल गरिएको थियो । शनिबारको गोष्ठिमा भने जनकपुरधामका विभिन्न कलेज, स्कुल तथा विश्वविद्यालयका शिक्षकहरूले सहभागिता जनाएका थिए ।

दुवै कार्यशाला गोष्ठीको सञ्चालन लिटिल एन्सजल्स कलेज अफ म्यानेजमेन्टका प्रधानाध्यापक डा. मित्रबन्धु पौडेल तथा डा. स्मृति कला पन्तले गरेका थिए ।

डा. मित्रबन्धु पौडेलद्वारा सञ्चालित विराटनगरको गोष्टीमा कलेजमा उद्यमशीलता वातावरण सिर्जना र पालनपोषण, कलेज तथा विश्वविद्यालयमा इन्क्युबेशन सेन्टर वा व्यावसायिक क्लिनिक स्थापना गर्ने, विद्यार्थीहरूको नेतृत्वमा हाट बजार व्यवस्थित रूपमा सञ्चालन गर्ने विषयमा छलफल गरिएको थियो भने शिक्षण सिकाउन भावनात्मक बुद्धिको भूमिका, कक्षा कोठा र बाहिर गोलम्यान मोडेलको व्यावहारिकताका विषयमा छलफल गरिएको थियो ।

डा. स्मृती कला पन्तद्वारा सञ्चालित गोष्ठीको दोस्रो सत्रमा वास्तविक संसार र सिकाइका बारेमा छलफल गरिएको थियो । यो सत्रमा मल्टिपल इन्टेलिजेन्स (विद्यार्थीहरूको विविध सीप तथा प्रतिभालाई प्रोत्साहन र प्रशंसा गर्ने), प्रयोगात्मक सिकाइ (नेपालमा सबैभन्दा राम्रो अभ्यास के हो ?), नयाँ सिकाइमा केएसए कि आस्क ? कोभिड महामारीपछि शिक्षण सिकाइ कसरी विकसित भएको छ ? आदि विषयमा छलफल गरिएको थियो ।

आयोजक संस्थाले विराटनगरको गोष्ठीमा सक्रियतापूर्वक सहभागिता जनाउँदै महत्त्वपूर्ण टिप्पणीका साथ प्रतिबद्धता व्यक्त गर्ने हिसानका उपाध्यक्ष भेषराज पोखरेलप्रति धन्यवाद ज्ञापन गरेको छ ।

जनकपुरको गोष्ठीमा शिक्षण सिकाइमा देखिएका चुनौती, विश्वमै रहेको उत्कृष्ट शिक्षण सिकाइका पद्धतिहरूको विषयमा चर्चा गरिएको प्रधानाध्यापक पौडेलले बताए । पौडेलले कुनै पनि क्षेत्रको विकासका लागि त्यहाँको मौलिकताका विषयमा विद्यालय स्तरबाटै विद्यार्थीहरूमा ज्ञान हुनु आवश्यक रहेको धारणा व्यक्त गरे ।

जनकपुरधामको गोष्ठीमा पौडेलले भने, ‘जनकपुरधाम धार्मिक पर्यटनको हब बन्न सक्छ । यहाँ रामायण सर्किटको काम हुँदै छ, जनकपुरधामको मत्स्य पालन, मिथिला चित्रकला लगायतका थुप्रै विषयमा केस स्टडीको माध्यमले शिक्षण सिकाइमा सामिल गर्न सकिने छ ।’

यी विषयहरूले समेत व्यावसायिक रूपमा विकास गर्न मद्दत पुर्‍याउने पोडेलको भनाइ थियो । यसका साथै जनकपुरधाममा शिक्षण सिकाइको क्षेत्रमा थुप्रै काम गर्न बाँकी रहेको उनले बताए । अहिले पनि यहाँका विद्यालयहरू विद्यार्थीको सर्वाङ्गिण विकासको दिशामा काम गर्नुको साटो परीक्षा केन्द्रित शिक्षामै लागेकोमा गुनासो गरेका थिए ।