सातौं संस्करणको विराट गोल्डकप फुटबल प्रतियोगिताको उपाधि घरेलु टोली विराटनगर सिटीले जितेको छ ।
गएराति सहिद रंगशालामा सम्पन्न फाइनलमा पाहुना टोली भारतको लुका सकर क्लबलाई ४–० गोल अन्तरले हराउँदै विराटनगरले उपाधि जितेको हो । विराटनगरले ६० वर्षपछि उपाधि उचाल्यो ।
यसअघि आयोजक टोलीले २०१९ सालमा उपाधि जितेको थियो । यसपटक विराटनगरलाई उपाधि दिलाउनेक्रममा अफिज ओलवाले, विमल घर्तीमगर, मेसुके र अभिषेक गुरूङले एक/एक गोल गरे । खेलको सातौं मिनेटमा विराटनगर सिटीका अफिज ओलावालेले गोल गर्दै टोलीलाई अग्रता दिलाए ।
उनले विमलको पासमा गोल गरेका थिए । ७८ औँ मिनेटमा विमलले पेनाल्टी एरियाबाट गोल गर्दै विराटनगरलाई २–० ले अघि बढाए । ८९ औँ मिनेटमा मेसुकेले गोल गर्दै विराटनगरको अग्रता तेब्बर पारे ।
उनले विमलको पासमा गोल गरे । इन्जुरी समयमा अभिषेकले गोल गर्दै टोलीलाई ४–० को फराकिलो जित दिलाए । उपाधिसँगै विराटनगरले २० लाख १५ हजार रुपैयाँ प्राप्त गर्यो । उपविजेता केरलाले १० लाख १५ हजार रुपैयाँमा चित्त बुझायो ।
त्यस्तै, बेस्ट प्लेयर अफ द टुर्नामेन्ट विराटनगर सिटीका मेसुके घोषित भए । फेयर प्लेर अफ द टुर्नामेन्ट अवार्ड जावलाखेल युथ क्लबले प्राप्त गर्यो । हाइस्कोर विराटनगर सिटीका अभिषेक गुरूङ घोषित भए ।
उत्कृष्ट फरवार्ड अवार्ड भारतका चाजिज क्युराको, उत्कृष्ट मिल्डफिल्डर विराटनगर सिटीका युका सुजुकी, उत्कृष्ट गोलकिपर विराटनगर सिटीका विशाल श्रेष्ठ घोषित भए ।
विराटनगरका देवेन्द्र तामाङले उत्कृष्ट रक्षकको अवार्ड पाए । विराटनगर सिटीका सन्तोष न्यौपाने उत्कृष्ट प्रशिक्षक छानिए । विधागत अवार्ड पाएकाले जनही २५ हजार रुपैयाँ प्राप्त गरे ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।