बंगलादेशविरुद्ध पहिलो मैत्रीपूर्ण फुटबल खेलमा नेपाल बराबरीमा रोकिएको छ । ढाकाको कमलपुरस्थित वीर श्रेष्ठ सहिद सिपाही मोहम्मद मुस्तफा कमल स्टेडियममा बिहीबार साँझ भएको खेलमा नेपालले बंगलादेशसँग १–१ गोलको बराबरी खेलेको हो ।
पहिलो हाफ गोलरहित बराबरीमा सकिएको खेलमा बंगलादेशले ६५औँ मिनेटमा सुरुवाती गोल गरेको थियो । बंगलादेशका लागि सविना खातुनले गोल गरिन् ।
त्यसपछि जोसिएको नेपालले दोस्रो हाफको इन्जुरी समयमा बराबरी गोल फर्कायो । नेपालका लागि सावित्रा भण्डारीले बराबरी गोल गरिन् । राष्ट्रिय टोलीबाट सावित्राको यो ४४औं गोल हो । उनी नेपालका लागि सर्वाधिक गोल गर्ने खेलाडी हुन् ।
नेपालले चीनमा आयोजना हुने १९औँ एसियाली खेलकुद (एसियाड) को तयारीका लागि बंगलादेशसँग मैत्रीपूर्ण खेल खेलेको हो । नेपाल र बंगलादेशबीचको दोस्रो मैत्रीपूर्ण खेल आइतबार हुनेछ ।
नेपालले यसअघि बंगलादेशसँग गत वर्ष काठमाडौंमा भएको साफ महिला च्याम्पियनसिपमा प्रतिस्पर्धा गरेको थियो । त्यतिवेला नेपाल बंगलादेशसँग ३–१ गोलले पराजित भएको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।