महिला विश्वकप फुटबल प्रतियोगिताको नवौँ संस्करण आज सकिँदैछ । इंग्ल्याण्ड र स्पेनले उपाधिका लागि दिउँसो प्रतिस्पर्धा गरेसँगै प्रतियोगिता सकिन लागेको हो ।
दिउँसो ३ः४५ बजे अस्ट्रेलिया रंगशालामा सुरु हुने फाइनलमा इंग्ल्याण्ड र स्पेन पहिलोपटक उपाधि जित्ने लक्ष्यका साथ मैदान उत्रनेछन् ।
दोस्रो सेमिफाइनलमा घरेलु टोली अस्ट्रेलियाविरुद्ध ३–१ को जित निकाल्दै इंग्ल्याण्ड पहिलोपटक फिफा महिला विश्वकपको फाइनलमा प्रवेश गरेको थियो ।
यस्तै, स्पेनले पहिलो सेमिफाइनलमा स्वीडेनलाई २–१ ले हराउँदै फाइनलमा स्थान बनाएको थियो । तेस्रो स्थानका लागि शनिबार ब्रिसबेनस्थित सनक्रप रंगशालामा भएको खेलमा स्वीडेनलाई जित दिलाउन फ्रिडालिना रोल्फो र कोसोभारे एस्लानीले गोल गरे ।
तेस्रो स्थानका लागि स्वीडेन र अस्ट्रेलियाबीच भएको खेलको ३०औँ मिनेटमा रोल्फोले गरेको गोलबाट स्वीडेनले अग्रता बनाएको थियो ।
६२औँ मिनेटमा एस्लानीले गोल गर्दै स्वीडेनको अग्रता दोब्बर पारिन् । योसँगै दुवै टिमबाट थप गोल नहुँदा स्वीडेनले दोस्रोपटक विश्वकपमा तेस्रो स्थान सुरक्षित गर्न सफल भयो ।
सन् २००३ को उपविजेता स्वीडेनले १९९१, २०११ र २०१९ मा तेस्रो स्थान हासिल गरेको थियो ।
२० जुलाईबाट सुरु भएको विश्वकपमा ३२ टोलीको सहभागिता रहेको थियो । सन् १९९१ देखि सुरु महिला विश्वकपमा झन्डै ५ करोड डलर बराबरको पुरस्कार राशि बढाएर अहिले १५ करोड २० लाख डलर पुर्याइएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
