नेपाली कांग्रेसका महामन्त्री गगन थापा र विश्वप्रकाश शर्माले सभापति शेरबहादुर देउवासँग भेटवार्ता गरेका छन् । आइतबार सभापति देउवाले कोशी घटनाको विषयमा छलफल गर्न महामन्त्री थापा र शर्मालाई आफ्नो निवासमा बोलाएका थिए ।
सो भेटमा उनीहरूले कोशी प्रदेश सरकार गठनको घटनाको मुख्य जिम्मेवारी देउवा स्वयंले लिनुपर्ने बताएका हुन् । भेटपछि पत्रकारहरुसँग कुरा गर्दै महामन्त्री शर्माले कोशीमा यो परिस्थिति देखापर्नुमा सबैभन्दा ठूलो कमजोरी सभापतिबाटै भएको आफूहरुले बताएको जानकारी दिए ।
कांग्रेस सभापति देउवाले कोशी प्रदेशमा माओवादीका इन्द्रबहादुर आङ्बोलाई मुख्यमन्त्रीका लागि सहमति दिएपछि शेखर पक्षका आठ र एमालेका ३९ सांसदको समर्थनमा केदार कार्कीले मुख्यमन्त्रीमा दाबी पेस गरेका थिए ।
कार्की मुख्यमन्त्रीमा नियुक्त भइसकेका छन् । उनले आफूलाई समर्थन गर्नेमध्येबाट एमाले र कांग्रेसका एकएकजना मन्त्री बनाइसकेका छन् । उनले कात्तिक १ गते विश्वासको मत लिने तयारी गरेका छन् ।
सभापतिसँगको भेटमा महामन्त्रीद्वयले प्रधानमन्त्री प्रचण्ड, देउवा र शेखर कोइरालाबीच चिर्कटोमा भएको सहमतिप्रति पनि आपत्ति जनाएका छन् ।
देउवासँगको छलफलपछि बाहिरिने क्रममा महामन्त्री शर्माले तीन नेताहरुबीच भएको चिर्कटोप्रति दुई महामन्त्रीको सहमति नभएको बताए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
