वेस्ट इण्डिज ‘ए’ विरुद्धको टी–२० सिरिजको दोस्रो खेलमा नेपालले टस हारेर फिल्डिङको निम्तो पाएको छ । यी दुई टिमबीचको दोस्रो खेल दिउँसो १२ः१५ देखि कीर्तिपुरस्थित त्रिवि मैदानमा सुरु हुँदैछ ।
नेपालले आज प्लेइङ–११ मा पाँच खेलाडी परिवर्तन गरेको छ । नेपालले दोस्रो खेलमा विवेककुमार यादव, प्रतिश जिसी, कमल सिंह ऐरी, अविनाश बोहरा र ललितनारायण राजवंशीलाई विश्राम दिएर लोकेश बम, आरिफ शेख, सोमपाल कामी, आकाश चन्द र सागर ढकाललाई मौका दिएको हो । सिरिजमा नेपाल १–० ले अगाडि छ ।
नेपालले शनिबार पहिलो खेलमा पाहुना टिम वेस्ट इण्डिजलाई चार विकेटले हरायो । नेपालको जितमा कप्तान रोहितकुमार पौडेलले शतकीय इनिङ खेले । ५४ बलको सामना गरेका उनले १० चौका र ६ छक्काको मद्दतमा ११२ रनको इनिङ खेलेका हुन् ।
नेपाल आज पनि खेल जितेर सिरिजमा २–० को अग्रता लिन चाहन्छ । सिरिज जित्न नेपालले अब दुई खेल जिते पुग्छ । नेपाल पहिलोपटक घरेलु मैदानमा वेस्ट इण्डिज ‘ए’ सँग खेलिरहेको हो । यद्यपि नेपालले वेस्ट इण्डिजको सिनियर टिमसँग भने यसअघि नै खेलिसकेको छ ।
गत वर्ष जिम्बाब्वेमा आयोजित एकदिवसीय विश्वकप छनोटमा नेपाल वेस्ट इण्डिजसँग १०१ रनले पराजित भएको थियो । नेपाल यसपटक आउँदो १ जुनदेखि सुरु हुने आइसिसी टी–२० विश्वकपको तयारीका लागि वेस्ट इण्डिज ‘ए’ सँग सिरिज खेलिरहेको हो ।
नेपालको प्लेइङ–११ : कुशल भुर्तेल, अनिल शाह, रोहितकुमार पौडेल (कप्तान), आरिफ शेख, दीपेन्द्र सिंह ऐरी, लोकेश बम, कुशल मल्ल, गुलशनकुमार झा, सोमपाल कामी, सागर ढकाल र आकाश चन्द ।
वेस्ट इण्डिज ‘ए’ को प्लेइङ–११ : जोनसन चार्ल्स, एलिक अथान्जे, आन्द्रे फ्लेचर, रोस्टन चेज (कप्तान), केसी कार्टी, म्याथ्यु फर्ड, ओबेद म्याककोय, गुडाकेश मोती, किमो पल, ओसेन थोमस र हेडन वाल्स ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
