आसन्न आइसिसी टी–२० विश्वकपको तयारीका लागि क्यारेबियन देश सेन्ट भिन्सेन्ट एन्ड ग्रेनाडिन्समा रहेको नेपाली क्रिकेट टोलीले आज विनवार्ड्स भोलक्यानोजविरुद्ध दोस्रो अभ्यास म्याच खेल्दैछ ।

यी दुई टिमबीचको दोस्रो खेल राति ८ः१५ देखि सुरु हुनेछ । सिरिजमा नेपाल १–० ले अघि छ । मंगलबार भएको पहिलो खेलमा नेपालले विनवार्ड्सलाई ४ विकेटले हरायो । 

नेपाल बिहीबार पनि जित निकालेर एक खेलअगावै मैत्रीपूर्ण सिरिज आफ्नो पक्षमा पार्न चाहन्छ । उता घरेलु टिम नेपाल विनवार्ड्स पहिलो जितको खोजीमा छ । उसले वेस्ट इण्डिजबाट अन्तर्राष्ट्रिय क्रिकेट खेलिसकेका काओइब होज, जेर्मी सोलोजानो, शेर्मोन लुईस र टेडी विश्वपलाई पनि नेपालविरुद्ध खेलिरहेको टिममा राखेको छ ।

अब उनीहरू दोस्रो खेलमा उत्कृष्ट प्रदर्शन गर्दै विनवार्ड्सलाई सिरिजमा जीवित राख्न चाहन्छन् । दोस्रो खेलमा नेपालले प्लेइङ–११ मा तीन खेलाडी परिवर्तन गर्ने सम्भावना छ । बिहीबार नेपालले अनिलकुमार साह, करण केसी र सागर ढकाललाई विश्राम दिएर कुशल मल्ल, अविनाश बोहरा र ललितनारायण राजवंशीलाई मौका दिने सम्भावना रहेको हो ।

दोस्रो खेलमा अनिल साह, करण केसी, कमल सिंह ऐरी र सागर ढकालले विश्राम पाउन सक्छन् । नेपालले विनवार्ड्ससँग तेस्रो अभ्यास खेल शनिबार खेल्नेछ । यो मैत्रीपूर्ण सिरिज खेलेपछि नेपाली टिम अमेरिका फर्किनेछ ।

विश्वकपअघि नेपालले २६ र २८ मेमा क्यानडा र अमेरिकासँग वार्मअप म्याच खेल्नेछ । त्यसपछि नेपालले विश्वकपमा ४ जुनमा नेदरल्याण्ड्स, १२ जुनमा श्रीलंका, १५ जुनमा दक्षिण अफ्रिका तथा १७ जुनमा बंगलादेशसँग खेल्ने तालिका छ ।

विश्वकपका लागि पूर्वकप्तान तथा स्टार स्पिनर सन्दीप लामिछाने पनि केही दिनभित्र टिमसँग जोडिने छन् । बुधबार उच्च अदालत पाटनले एक मुद्दामा सफाइ दिएसँगै उनी विश्वकपका लागि टिममा जोडिने भएका हुन् । सन्दीपले विश्वकप खेल्ने भएसँगै नेपालको टोली थप सन्तुलित देखिनेछ ।