देशका विविध क्षेत्रमा ख्याति कमाएका व्यक्तिहरूको बालापन समेटिएको विन्दुकुमारी ढकालद्वारा लिखित संस्मरण संग्रह ‘कोपिलाका सुगन्ध’ आज एक कार्यक्रमबीच विमोचन गरिएको छ ।

सीताराम–पदमकुमारी फाउन्डेसनले शनिबार आयोजना गरेको कार्यक्रममा हास्यकलाकार हरिवंश आचार्यले उक्त पुस्तक विमोचन गरे । उनले भने, ‘यो पुस्तकमा मेरो कथासहित देशका ख्यातिप्राप्त व्यक्तिहरूका कथाका विषयमा लेखिएको छ, लेखन तथा साहित्यिक क्षेत्रमा यतिसम्मको कलम चलाउन सक्नु ठूलो कुरा हो ।’

उनले मदनकृष्ण श्रेष्ठ र आफू हास्यव्यंग्यकै माध्यमबाट चिनिन सफल भएका र उक्त क्षेत्रमा काम गर्दा कैयौँपटक प्रहरी हिरासतमा परेको स्मरण सुनाए । घरपरिवारले साथ दिए साहित्यदेखि कथा, कविता र पुस्तक लेखन सहज हुने उनले बताए । 

अर्का  हास्यकलाकार मनोज गजुरेलले विन्दुकुमारी ढकालद्वारा लिखित संस्मरण संग्रह कोपिलाका सुगन्ध मार्मिक एवं सान्दर्भिक रहेको बताए । 

प्रमुख अतिथि पूर्वमन्त्री शंकरप्रसाद कोइरालाले देशका नाम चलेका व्यक्तिका बालापन समेटिएको पुस्तक पठनीय भएको बताए । 
    
लेखक विन्दुकुमारी ढकालले घरपरिवार, विभिन्न राष्ट्रियस्तरका पत्रपत्रिकाका एवं सञ्चारमाध्यमको साथ र सहयोगका कारण आफूले साहित्यलगायत पुस्तक लेखनमा अघि बढ्न सफल भएको बताए । उनले आफ्ना श्रीमान् प्रहरी अतिरिक्त महानिरीक्षक भीमप्रसाद ढकालको प्रेरणाबाट लेखनमा लागेको बताए । 

ढकालद्वारा लिखित उक्त पुस्तकमा अनुराधा कोइराला, डा. आशा सिंह, उर्मिला उपाध्याय गर्ग, करिष्मा मानन्धर, कालिप्रसाद बास्कोटा, कुलमान घिसिङ, कृष्णचन्द्र शर्मा, प्रा.डा. कृष्णहरि बराल, केदार घिमिरे (माग्ने बुढा), गंगा सुवेदी, गंगाप्रसाद उप्रेती, गीता केशरी, गुणराज लुइँटेल, डा. चन्द्रमणि अधिकारी, जितु नेपाल (मुन्द्रे), ढुण्डिराज शास्त्री, तिलबहादुर कार्की, दिनेशकुमार थपलिया, डा निलम ढुंगाना, परशु प्रधान, पारस खड्का, प्रकाश सपुत, प्रतिभा राणा, भवानी राणा, भेषराज कँडेल, मनोज गजुरेल, महाप्रसाद अधिकारी, महावीर पुनको बालापन समेटिएको छ ।
 
त्यस्तै, माधवकुमार नेपाल, प्रा माधवप्रसाद आचार्य, डा. मानबहादुर विश्कर्मा, मेलिना राई, मोदनाथ प्रश्रित, यादव खरेल, डा. यावदकुमार भट्ट, प्रा.डा. युवराज संग्रौला, राजेश हमाल, राधिका शाक्य, व्याकुल माइला, शंकरप्रसाद कोइराला, शशि शाह, डा. शान्तराज सुवेदी, शेरबहादुर कुँवर केसी, सपना प्रधान मल्ल, सर्वेन्द्र खनाल, सीताराम कट्टेल (धुर्मुस), सुनिल पोख्रेल, सुशीला कार्की तथा हरिवंश आचार्यका बालापन पनि समेटिएको छ ।