नेपाल प्रेस युनियनका केन्द्रीय अध्यक्ष शिव लम्सालले नेपाल पत्रकार महासंघको निर्वाचनमा मतदान गर्नबाट कोही पत्रकार वञ्चित हुन नहुने बताएका छन् ।
आज नैकापमा नेपाल प्रेस युनियन काठमाडौं शाखाले आयोजना गरेको बैठक तथा छलफलमा अध्यक्ष लम्सालले मतदानबाट कोही पत्रकार पनि वञ्चित नहुने गरी महासंघले मतदाता नामावली सार्वजनिक गर्नेमा आफू विश्वस्त रहेकोसमेत बताए ।
‘सदस्यता शुद्धीकरणको मापदण्डअनुसार नै सदस्यता रद्द गर्ने वा नवीकरण गर्ने काम हुन्छ भन्नेमा म विश्वस्त छु । त्यसैले महासंघले सार्वजनिक गर्ने मतदाता नामावलीमा पत्रकार छुट्दैनन्, छुट्नुहुँदैन,’ अध्यक्ष लम्सालले भने ।
सदस्यताको विषयमा उठिरहेका प्रश्न लिएर महासंघ नेतृत्वसँग छलफल गरिरहेको पनि उनले जानकारी दिए ।
युनियन काठमाडौं शाखा अध्यक्ष महेश गौतमले सदस्यताको विवाद मिलाएर मात्र महासंघले निर्वाचन प्रक्रिया अगाडि बढ्नुपर्नेमा जोड दिए ।
त्यसअवसरमा युनियनका केन्द्रीय महासचिव दिलीप पौडेल, युनियन ललितपुर शाखा अध्यक्ष केदारनाथ दाहाललगायतको सहभागिता थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
