इण्डियन प्रिमियर लिग (आइपिएल) को समूह चरणको अन्तिम खेल वर्षाका कारण रद्द भएको छ । आइतबार राति तय गरिएको राजस्थान रोयल्स र कोलकाता नाइट राइडर्सबीचको खेल रद्द भएको हो ।
खेल रद्द भएपछि दुवै टिमले एक–एक अंक लिएका छन् । कोलकाताले पहिला नै क्वालिफायर वान खेल्ने पक्का गरेको थियो । क्वालिफायर वान खेल्नका लागि राजस्थानलाई जित्नैपर्ने दबाब रहेको खेल वर्षाका कारण प्रभावित भएपछि अब उसले एलिमिनेटर खेल्नुपर्ने भएको छ ।
आइतबार लामो प्रतीक्षापछि केवल टस सम्भव भयो, जसमा कोलकाताले पहिले बलिङ रोजेको थियो । तर, लगत्तै पानी परेपछि खेल रद्द भयो । यो खेल रद्द भएपछि दुवै टोलीले एक–एक अंक पाए पनि राजस्थान रोयल्स दोस्रो स्थान गुमाउँदै तेस्रो स्थानमा झरेको छ ।
कोलकाताको खेलको नतिजा जस्तोसुकै भए पनि पहिलो स्थानमा रहने निश्चित थियो । तर, राजस्थानले जित निकाल्दै १८ अंकसहित दोस्रो स्थानमा उक्लने मौका पाए पनि एक अंक मात्र पाउँदा १७ अंक मात्रै बनायो ।
सनराइजर्स हैदराबादको पनि त्यति नै अंक छ । तर, हैदराबादको नेट रन रेट राम्रो छ । जसका कारण हैदरावाददोस्रो स्थानमा उक्लिँदा राजस्थान रोयल्स तेस्रो स्थानमा नै चित्त बुझाउन बाध्य भयो ।
आइपिएलको क्वालिफायर वानमा कोलकाता नाइट राइडर्स र सनराइजर्स हैदराबाद खेल्ने छन् । यस्तै, प्लेअफमा राजस्थान रोयल्सको भेट रोयल च्यालेन्जर्स बेंगलुरुसँग हुनेछ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
