नायक धिरज मगर र नायिका उपासना सिंह ठकुरीको मुख्य भूमिका रहेको फिल्म ‘खुस्मा’को छायाङ्कन ४० दिनमा सकिएको छ । पहिलो चरणमा मनाङमा छायाङ्कन गरिएको फिल्मको दोस्रो चरणको छायाङ्कन पूर्वी रुकुम र कास्कीमा गरिएको हो ।
निर्माण पक्षका अनुसार फिल्मको एक गीत छायाङ्कन गर्न बाँकी छ । मगर समुदायको परिवेशमा निर्माण गरिएको प्रेमकथामा आधारित फिल्मले जनयुद्धको प्रभावका बीच अंकुराएको प्रेमलाई पर्दामा देखाउने छ ।
एम मिडिया प्रालिको ब्यानरमा निर्माण भएको फिल्ममा अशोक थापा मगरको लेखन तथा निर्देशन छ । केही वृत्तचित्र निर्माण गरेका मगरको यो ‘डेब्यू’ निर्देशकीय फिल्म हो । निर्देशक थापाले नौ वटा विभिन्न अन्तर्राष्ट्रिय फिल्म महोत्सवबाट अवार्ड प्राप्त गरिसकेका छन् ।
फिल्मका निर्मातामा वीरबहादुर लामा, चन्द्रबहादुर भट्टचन र बेतान मगर तथा सह–निर्मातामा मानबहादुर धनाह मगर र सुस्मिता बुढाथोकी छन् । मोहन राई कार्यकारी निर्माता रहेको फिल्ममा दीपक बज्राचार्यको छायाङ्कन रहेको छ ।
फिल्ममा धिरज र उपासनासँगै माओत्से गुरुङ, खड्कबहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र, विवेश मगरलगायतका कलाकारको अभिनय रहेको छ ।
फिल्ममा एसडी योगी र छान्जु पार्क (कोरियन) को संगीत, सुरेन्द्र राना, राम अविरल विष्ट र निर्देशक थापा मगरको गीत रहेको छ । फिल्म असोज ३ गतेबाट नेपालसहित विदेशमा पनि एकसाथ रिलिज हुनेछ । फिल्मको वितरण गोविन्द शाहीको काफिया फिल्मस्ले गर्नेछ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
