सत्ताको नेतृत्व गरेको नेकपा माओवादी केन्द्रले आफ्नो पार्टीबाट मन्त्री बनेकामध्ये एक वर्ष पुगेका मन्त्रीहरूलाई फिर्ता बोलाउने भएको छ ।
माओवादीले परराष्ट्रमन्त्री नारायणकाजी श्रेष्ठ, सञ्चार तथा सूचना प्रविधिमन्त्री रेखा शर्मा र ऊर्जा, जलस्रोत तथा सिँचाइमन्त्री शक्तिबहादुर बस्नेतलाई फिर्ता बोलाउने तयारी गरेको हो ।
जेठ अन्तिम सातासम्ममा मन्त्रिपरिषद् हेरफेर गरिसक्ने प्रधानमन्त्रीको सचिवालयको तयारी छ । यसका लागि प्रधानमन्त्रीले पार्टीका नेताहरूसँग निरन्तर अनौपचारिक छलफल गरिरहेका छन् ।
अर्थमन्त्री वर्षमान पुन र संस्कृति, पर्यटन तथा नागरिक उड्डयनमन्त्री हितबहादुर तामाङलाई भने निरन्तरता दिने प्रधानमन्त्रीको तयारी छ । तामाङको मन्त्रालय भने हेरफेर हुने भएको छ । पर्यटन मनत्रालयमा नाउपाकी अध्यक्ष रञ्जिता श्रेष्ठलाई ल्याउने तयारी छ ।
माओवादीबाट रिक्त हुने मन्त्रालयमा माधव सापकोटा, राजन दाहाल र महेन्द्रबहादुर शाहीको चर्चा छ । उनीहरूमध्ये सापकोटाको सम्भावना बलियो छ । उनलाई सूचना तथा सञ्चार या परराष्ट्रमन्त्री बन्ने सम्भावना छ ।
शक्ति बस्नेतलाई ऊर्जा मन्त्रालयबाट हटाएर पर्यटन मन्त्री रहेका तामाङलाई सो मन्त्रालयमा पठाउने तयारी छ । दाहाल या शाहीमध्ये एकलाई मन्त्री तथा सुशीला श्रीपालीलाई राज्यमन्त्री बनाउने माओवादीको तयारी छ ।
नाउपा र जनमतलाई एक–एक मन्त्रालय दिने प्रधानमन्त्रीको तयारी छ । त्यसका लागि माओवादी र एमालेले एक–एक मन्त्रालय छाड्नुपर्नेछ ।
यता, जसपा टुक्र्याएर नयाँ पार्टी गठन गरेको अशोक राई नेतृत्वको पार्टीले पनि थप एक मन्त्रालयमा दाबी गरिरहेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
