बागमती प्रदेश सरकारले आगामी आर्थिक वर्षका लागि बजेटको आकार बढाएको छ । शनिबार प्रदेश सभा बैठकमा आर्थिक मामिला तथा योजना मन्त्री जगन्नाथ थपलियाले आगामी आर्थिक वर्षको बजेट प्रस्तुत गरे ।
उनले कूल ६४ अर्ब ५४ करोड ९४ लाख ३१ हजार रुपैयाँको बजेट ल्याएको जानकारी गराए । जसमा पुँजीगततर्फ ३७ अर्ब ९३ करोड ८७ लाख ४९ हवजार, चालूतर्फ २६ अर्ब १० करोड १६ लाख ८२ हजार रुपैयाँ र वित्तिय व्यवस्थापनतर्फ १ अर्ब ५० करोड रुपैयाँ बजेट विनियोजन गरिएको छ ।
आगामी आर्थिक वर्षको खर्च बेहोर्ने स्रोतमध्ये कर राजस्वबाट २७ अर्ब ३८ करोड ५७ लाख रुपैयाँ, अन्य राजस्वबाट ६ अर्ब ५१ करोड रुपैयाँ, संघीय वित्तीय हस्तान्तरणबाट १५ अर्ब ५७ करोड ६५ लाख रुपैयाँ, चालू आर्थिक वर्षको अनुमानित सञ्चित कोषको बचत र अन्य प्राप्तिबाट १४ अर्ब ८६ करोड रुपैयाँ अनुमान गरिएको छ ।
बागमती प्रदेश सरकारले चालू आर्थिक वर्षका लागि ६२ अर्ब ७७ करोड ९० लाख रुपैयाँ बजेट ल्याएको थियो। आगामी आर्थिक वर्ष २०८१–०८२ का लागि बागमती प्रदेश सरकारले ल्याएको बजेट चालू आर्थिक वर्षको भन्दा झण्डै दुई अर्ब बढी हो ।
आगामी आर्थिक वर्षका लागि कोशी सरकारले आर्थिक वर्ष २०८१–०८२ को लागि ३५ अर्ब २७ करोड ८५ लाखको बजेट ल्याएको छ । त्यस्तै, कर्णाली प्रदेश सरकारले आगामी आर्थिक वर्षका लागि ३१ अर्ब ४१ करोड ४१ हजार बराबरको बजेट ल्याएको छ ।
गण्डकी प्रदेश सरकारले ३२ अर्ब ९६ करोड ८५ लाख रुपैयाँको बजेट ल्याएको छ भने सुदूरपश्चिम प्रदेश सरकारले ३१ अर्ब ९८ लाखभन्दा बढीको बजेट सार्वजनिक गरेको छ ।
लुम्बिनी प्रदेश सरकारले आगामी आर्थिक वर्ष २०८१/८२ का लागि कूल ३८ अर्ब ९५ करोड ९५ लाख ३६ हजारको बजेट विनियोजन गरेको छ । अन्य प्रदेशको तुलनामा बागमतीको बजेटको आकार दोब्बर हाराहारी छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
