बझाङको छबिसपाथिभेरा गाउँपालिकाले ठूलो संख्यामा करारमा कर्मचारी नियुक्त गरेको पाइएको छ । महालेखापरीक्षक कार्यालयको वार्षिक प्रतिवेदनअनुसार सो पालिकाले करार दरबन्दीको विभिन्न पदमा ३३ जना कर्मचारीलाई नियुक्त गरेको पाइएको हो ।
छसिबपाथिभेराले एकजना इन्जिनियर, दुईजना सव–इन्जिनियर, तीनजना सहायक पाँचौँ, दुईजना सहायक चौथो, एकजना अधिकृत (छैटौँ), तीनजना पशु सेवा (चौथो) ६ जना अहेव, सातजना अनिमी, एकजना एचए र सात जनालाई ल्याब टेक्निसियनलाई करारमा नियुक्त गरिएको पाइएको महालेखाले २०८० को वार्षिक प्रतिवेदनमा उल्लेख गरेको छ । प्रतिवेदनअनुसार ती कर्मचारीका लागि पालिकाले वर्षमा कूल १ करोड ११ लाख ५६ हजार ४ सय ९६ रुपैयाँ पारिश्रमिकमा खर्च गरिरहेको छ ।
करार दरबन्दीमै करोड खर्च गरिरहेको छबिसपाथिभेराको आम्दानी भने निकै न्यून छ । पालिकाले गत आर्थिक वर्ष (२०७९/८०) मा २८ लाख रुपैयाँ मात्र आम्दानी गरेको छ ।
स्थानीय सरकार सञ्चालन ऐन, २०७४ को दफा (८३) (८) मा स्थानीय तहले नगर प्रहरी, सवारी चालक, सयस, बगैंचे, प्लम्बरलगायत पद तथा सेवामा बाहेक करारमा कर्मचारी नियुक्त गर्न पाइँदैन । तर, पालिकाले भने ठूलो पारिश्रमिक दिएर ३३ जनालाई करार दरबन्दीमा कर्मचारी राखेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
