नेपाली कांग्रेसका प्रवक्ता डा. प्रकाशशरण महतले अब संविधान संशोधनको विषयमा प्रवेश गर्नुपर्ने बताएका छन् । बिहीबार लैङ्गिक समानता अभिवृद्धिका लागि नेपाल महिला संघको भावी कार्य योजना निर्माण विषयक कार्यशाला गोष्ठीलाई सम्बोधन गर्दै उनले समावेशिता, समानुपातिकता प्रत्यक्ष निर्वाचनबाट मात्र सम्भव भएको भन्दै त्यसको लागि संविधान संशोधनको विषयमा प्रवेश गर्नुपर्ने बताए ।
उनले भने, ‘हाम्रो संविधानमा समानुपातिक र प्रत्यक्ष निर्वाचन प्रणाली छ । अहिले सभापतिले अधिवेशनमा त्यसलाई प्रवेश पनि गराइसक्नुभएको छ । अब हामीले संविधान संशोधनको विषयमा प्रवेश गर्नुपर्छ । समावेशिता, समानुपातिकता प्रत्यक्ष निर्वाचनबाटै हुनसक्छ । अब त्यस बाटोमा नेपाली काँग्रेसले अभियान छेड्नुपर्छ । राष्ट्रिय सहमति जुटाउनुपर्छ ।’
यस्तै, उनले राजनीतिक क्षेत्रमा मात्र होइन अन्य क्षेत्रको सम्पूर्ण महिलाको अधिकारको लागि पनि लड्नुपर्ने बताए । उनले भने, ‘पछिल्लो समयमा संविधान निर्माण गर्दा कम्तिमा पनि ३३ प्रतिशत महिलाको अनिवार्य राजनीतिक सहभागिता हरेक तहमा हुनुपर्ने कुरा सुनिश्चित गरेका छौ । म त्यस्तो दिन हेर्न चाहन्छु, जुन बेला पुरुषहरूको तुलनामा महिलाहरूको ९० प्रतिशत सहभागिता हुन्छ । पहिला ९९ प्रतिशत पुरुष हुन्थे । राजनीतिक क्षेत्रमा मात्र होइन अन्य क्षेत्रको सम्पूर्ण महिलाको अधिकारको लागि पनि हामीले काम गर्नुपर्छ ।’
सोही कार्यक्रममा पार्टीका महामन्त्री विश्वप्रकाश शर्माले समाजमा अहिले सबैभन्दा नेपाली महिलालाई हिंसाबाट मुक्ति गर्ने शान्ति प्रक्रियाको आवश्यकता भएको बताए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
