अन्तर्राष्ट्रिय फौजदारी अदालत (आइसिसी)ले रुसका जनरल स्टाफ प्रमुख भ्यालेरी गेरासिमोभ र पूर्वरक्षामन्त्री सर्गेई सोइगुविरुद्ध पक्राउ पुर्जी जारी गरेको मंगलबार बताएको छ ।
नागरिक वस्तुहरूमा आक्रमण गर्ने र नागरिकहरूलाई अत्यधिक आकस्मिक हानि पुर्याउने कथित युद्ध अपराधका साथै युक्रेनमा ‘अमानवीय कार्यहरू’को मानवताविरुद्धको अपराधका लागि पक्राउ पुर्जी जारी गरिएको आइसिसीले एक विज्ञप्तिमा जनाएको छ ।
‘कम्तीमा सन् २०२२ अक्टोबर १० देखि सन् २०२३ मार्च ९ सम्म युक्रेनी विद्युतीय पूर्वाधारविरुद्ध रुसी सशस्त्र सेनाहरूले गरेको मिसाइल हमलाको जिम्मेबारी दुई संदिग्ध व्यक्तिले बहन गर्ने उचित आधारहरू छन्,’ आइसिसी न्यायाधीशहरूले भनेका छन् ।
अदालतले यी आक्रमण ‘नागरिक वस्तुहरू विरुद्ध निर्देशित’ थिए र लक्ष्यहरू सैन्य मान्न सकिन्छ भनिए पनि नागरिक क्षति ‘प्रत्याशित सैन्य फाइदाका लागि स्पष्टरूपमा अत्यधिक हुने थियो’ भनेको छ ।
अदालतले गत वर्षको मार्चमा रुसी राष्ट्रपति भ्लादिमिर पुटिनका लागि पक्राउ पुर्जी जारी गरेको थियो । उक्त फैसलालाई मस्कोले ‘अमान्य’ भनेको थियो । जवाफमा रुसले आइसिसीका अध्यक्षविरुद्ध आफ्नै पक्राउ पुर्जी जारी गरेको थियो ।
हेगस्थित आइसिसीसँग पक्राउ पुर्जी लागू गर्नका लागि आफ्नै प्रहरी बल छैन । यसलाई कार्यान्वयन गर्नका लागि आफ्ना एक सय २४ सदस्यको न्याय प्रणालीमा निर्भर छ ।
सैद्धान्तिक रूपमा वारेन्टअन्तर्गत कुनै पनि गिरफ्तारीको डरले आइसिसी सदस्य मुलुकको भ्रमण गर्नबाट रोकिएको छ ।
पुटिनले विशेषगरी आइसिसी सदस्य नभएका किर्गिस्तान, साउदी अरब र संयुक्त अरब इमिरेट्सको विदेश भ्रमण गरिरहेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।