दक्षिण अफ्रिका नवौँ संस्करणको आइसिसी टी–२० विश्वकप क्रिकेटको फाइनलमा भारतले दिएको १ सय ७७ रनको लक्ष्य पछ्याउनेक्रममा दक्षिण अफ्रिकाले पाँचौं विकेट गुमाएको छ । दक्षिण अफ्रिकाले पाँचौं विकेटको रूपमा आक्रामक ब्याटर हेनरिक क्लासेनलाई गुमाएको हो ।
उनी १६.१ ओभरमा हार्दिक पाण्ड्याको बलमा क्याच आउट भए । क्लासेनले आज २७ बलमा पाँच छक्का र दुई चौकासहित ५२ रन बनाए । दक्षिण अफ्रिकाले चौथो विकेटको रूपमा ओपनर क्विन्टन डिककलाई गुमायो । उनी ११.३ ओभरमा अर्शदीपको बलमा क्याच आउट भए ।
डिककले फाइनलमा ३१ बलमा चार चौका र एक छक्कासहित ३९ रनको पारी खेले । दक्षिण अफ्रिकाले तेस्रो विकेटको रूपमा ट्रिस्टन स्टब्सलाई गुमायो । उनी ६.५ ओभरमा अक्षर पटेलको बलमा बोल्ड भए ।
स्टब्सले आज २१ बलम तीन चौका र एक छक्कासहित ३१ रनको पारी खेले । दक्षिण अफ्रिकाले दोस्रो विकेटको रूपमा कप्तान एडन मार्कमलाई गुमायो । उनी २.३ ओभरमा चार रनमा क्याच आउट भए ।
मार्कमलाई अर्शदीप सिंहले आउट गरेका हुन् । दक्षिण अफ्रिकाले पहिलो विकेटको रूपमा रीजा हेन्ड्रिक्सलाई गुमायो ।
उनी १.३ ओभरमा जसप्रित बुमराहको बलमा चार रनमा बोल्ड भए । दक्षिण अफ्रिकाले यो समाचार तयार पार्दासम्म ९ ओभरमा चार विकेट गुमाएर ७१ रन बनाएको छ ।
त्यसअघि बार्बाडोसस्थित केन्सिङ्टन ओवल मैदानमा टस जितेर ब्याटिङ रोजेको भारतले निर्धारित २० ओभरमा ७ विकेट गुमाएर १ सय ७६ रन बनायो ।
उसका लागि ओपनिङ ब्याटर विराट कोहलीले अर्धशतकीय इनिङ खेले । उनले आज ५९ बलमा ६ चौका र दुई छक्कासहित ७६ रनको इनिङ खेले । विश्वकप २०२४ मा उनको यो पहिलो अर्धशतक हो । समग्र टी–२० आई करियरमा भने कोहलीको यो ३८औँ अर्धशतक हो ।
यस्तै, अलराउन्डर अक्षर पटेलले ३१ बलमा चार छक्का र एक चौकासहित ४७ रन बनाए । त्यस्तै, शिवम दुबेले १६ बलमा तीन चौका र एक छक्कासहित २७ रनको पारी खेले ।
दक्षिण अफ्रिकाका लागि केशव महाराज र एनरिक नोर्टजेले दुई–दुई तथा मार्को यान्सन र कागिसो रबाडाले एक/एक विकेट लिए । जारी विश्वकपमा भारत र दक्षिण अफ्रिका अपराजित छन् । भारतले १० वर्षपछि तथा दक्षिण अफ्रिकाले पहिलोपटक विश्वकप फाइनल खेलिरहेका हुन् ।
भारतले हालसम्म एकपटक टी–२० विश्वकपको उपाधि जितेको छ । उसले सन् २००७ को संस्करणको उपाधि जितेको थियो । त्यसयता भारतले उपाधि हात पार्न सकेको छैन ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।