माओवादी केन्द्रका अध्यक्ष समेत रहेका प्रधानमन्त्री पुष्पकमल दाहाल प्रचण्डले एमाले अध्यक्ष केपी शर्मा ओलीलाई गठबन्धनमा थमाउन अन्तिम प्रयास गरेका छन् । ओलीले नेपाली कांग्रेसका सभापति शेरबहादुर देउवालाई शनिबार आफ्नै निवास बालकोटमा बोलाएर लामो छलफल गरेपछि प्रधानमन्त्री प्रचण्डले सोही बेलुका ओलीसँग टेलिफोन वार्ता गरेका थिए ।
त्यतिले चित्त नबुझेपछि उनले आइतबार र सोमबार ओलीसँग लामो छलफल गरे । छलफलका क्रममा प्रचण्डले आफू सबै असहमति सम्बोधन गर्न तयार रहेको बताएका थिए । आफू अब बढीमा सात आठ महिना मात्रै प्रधानमन्त्रीमा बस्ने भन्दै प्रचण्डले त्यसपछि वर्तमन गठबन्धनबाटै प्रधानमन्त्री बन्न प्रस्ताव गरेको बुझिएको छ ।
स्रोतका अनुसार प्रधानमन्त्री प्रचण्डले आफू राजनीतिक नियुक्तिका लागि पनि हदैसम्म लचक हुन तयार रहेको वचन दिएका थिए । कांग्रेससँग मिलेर सरकार बनाउन सहज नहुने भन्दै उनले अहिले प्रधानमन्त्रीमा नियुक्त भए पनि ३० दिनभित्र विश्वासको मत लिन गाह्रो हुने बताएका थिए ।
त्यसपछिको परिस्थितिमा आफूले साथ दिन नसक्ने भन्दै प्रधानमन्त्री दाहालले त्यसपछि सबैभन्दा ठूलो दलको नेताको हैसियतले देउवा प्रधानमन्त्री हुने र उनले पनि विश्वासको मत नपाए मुलुक मध्यावधिमा जाने तर्क गरेका थिए ।
जवाफमा ओलीले नेपालको आन्तरिक राजनीति र बाह्य चासो समेतलाई ख्याल गरेर निर्णय लिने बताएका थिए । सोमबार साँझ ओलीले आफ्नो दलबाट सरकारमा नेतृत्व गरेका रघुवीर महासेठसँग छलफल गरेका छन् । सुरुमा उनले सबै मन्त्रीलाई आफ्नो निवासमा बोलाएका थिए । तर, सञ्चारमाध्यममा त्यसको प्रचार भएपछि उनले महासेठ मात्रैलाई बोलाएर छलफल गरेका हुन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।