भारत नवौँ संस्करणको महिला एसिया कप टी–२० प्रतियोगिताको फाइनल प्रवेश गरेको छ । आज सम्पन्न सेमिफाइनल खेलमा बंगलादेशलाई १० विकेटले हराउँदै भारत अपराजित रहेर एसिया कपको फाइनल प्रवेश गरेको हो ।
सेमिफाइनलमा बंगलादेशले दिएको ८१ रनको सामान्य लक्ष्य भारतले ११ ओभरमा कुनै पनि विकेट नगुमाएर पूरा गर्यो । उसका लागि अविजित हरेका स्मृति मान्धनाले अविजित ५५ र शफाली वर्माले २६ रन बनाए ।
त्यसअघि श्रीलंकाको डाम्बुला अन्तर्राष्ट्रिय स्टेडियममा टस हारेर ब्याटिङको निम्तो पाएको बंगलादेशले निर्धारित २० ओभरमा ८ विकेट गुमाएर ८० रन बनायो ।
उसका लागि कप्तान निगार सुल्तानाले ५१ बलमा दुई चौकासहित सर्वाधिक ३२ रन बनाइन् । यस्तै, शोर्ना अख्तरले १८ बलमा दुई चौकासहित अविजित १९ रन जोडिन् । बाँकी ब्याटरले भने दोहोरो अंकमा समेत रन बनाउन सकेनन् ।
भारतका लागि रेणुका सिंह र राधा यादवले तीन/तीन तथा दिप्ती शर्मा र पूजा वस्त्रकारले एक/एक विकेट लिए । अब भारतले उपाधिका लागि श्रीलंका र पाकिस्तानबीचको विजेता टिमको सामना गर्नेछ ।
श्रीलंका र पाकिस्तानबीचको दोस्रो सेमिफाइनल खेल आज राति ७ः४५ देखि सुरु हुनेछ । जारी संस्करणमा नेपालको पनि सहभागिता थियो ।
समूह चरणबाट बाहिरिएको नेपालले तीनमध्ये दुईमा हार तथा एक खेलमा जित निकालेको थियो । नेपालले यूएईलाई हराउँदा भारत र पाकिस्तानसँग हार बेहोरेको हो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
