नेपाली क्रिकेट टिमका पूर्वकप्तान सन्दीप लामिछानेलाई बलात्कारको मुद्दा दर्ता गरेकी गौशाला २६ ले उच्च अदालत पाटनले दिएको फैसलाविरुद्ध सर्वोच्चमा पुनरावेदन नगर्ने भएकी छन् ।
उनले गत २ जेठमा उच्च अदालतले सन्दीपलाई सफाइ दिने गरी गरेको फैसलाविरुद्ध सर्वोच्च नजाने भन्दै उच्च सरकारी वकिलको कार्यालयमा निवेदन दिएकी हुन् ।
गौशाला २६ ले उक्त निर्णयसहित उच्च सरकारी वकिलको कार्यालयमा निवेदन दिएसँगै अब सन्दीपले बलात्कार मुद्दाबाट उच्चदेखि नै स्थायीरूपमा राहत पाउने निश्चित भएको छ । उन ले उच्च सरकारी वकिलकहाँ दर्ता गराएको उक्त निवेदनमा सन्दीपविरुद्धको मुद्दा दर्ता गराएदेखि नै आफूलाई अनेक किसिमको तनाव आइलागेको उल्लेख गरेकी छन् ।
उनले आफूमा परेको मानसिक तनावको विभिन्न व्यक्ति र संस्थाहरूले फाइदा उठाएको पनि बताएकी छन् । त्यस्तै, गौशाला २६ ले सन्दीपविरुद्ध ती व्यक्ति र संस्थाले अनेक भ्रम छरेर आफूलाई दबाब दिएको पनि निवेदनमा लेखेकी छन् ।
उनले आफूलाई सन्दीपले बलात्कार नगरेको जिकिरसहित अब मुद्दा अघि नबढाउने उल्लेख गरेकी छन् । आफूलाई उच्च अदालत पाटनको फैसला स्वीकार्य भएको पनि उनले निवेदनमा भनेकी छन् ।
उच्चले मुद्दाको फैसलाका क्रममा लिएका आधारको आफूले सम्मान गर्ने बताउँदै शान्तिपूर्वक बाँच्न यस्तो निर्णय लिँदै मुद्दा अघि बढाउने निर्णयमा नपुगेको पनि गौशाला–२६ ले उल्लेख गरेकी छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
