आइसिसी विश्वकप लिग–२ सिरिजको अभ्यासका लागि हाल श्रीलंकामा रहेको नेपाली टिमले आज तेस्रो तथा अन्तिम म्याच खेल्ने तालिका छ । नेपाल र श्रीलंका डेभलपमेन्ट–११ बीचको खेल बिहान १०ः१५ देखि सुरु हुनेछ ।

यद्यपि तेस्रो खेलमा पनि वर्षा बाधक बन्ने सम्भावना छ । यसअघिको दुई अभ्यास खेल पनि वर्षाका कारण रद्द भएका थिए । यदि शुक्रबार पनि खेल रद्द हुन्छ भने नेपाली टिम श्रीलंकाबाट अभ्यासबिना क्यानडा प्रस्थान गर्नेछ । र, त्यहाँ केही दिन प्रशिक्षण गरेर टिमले श्रृंखला खेल्नेछ, जसअनुसार नेपालले लिग–२ मा १६ सेप्टेम्बरमा क्यानडासँग खेल्नेछ ।

यस्तै, नेपालले दोस्रो खेलमा १८ सेप्टेम्बरमा ओमानको सामना गर्नेछ । त्यसपछि नेपालले २२ सेप्टेम्बरमा क्यानडा तथा २४ सेप्टेम्बरमा ओमानसँग खेल्ने तालिका छ । गत संस्करणमा तेस्रो भएको नेपालले यसपालिको लिग–२ मा अपेक्षाकृत सुरुवात गर्न सकेन । जारी लिग–२ को पहिलो श्रृंखलामा नेपालले चारमध्ये तीनमा हार तथा एक खेलमा मात्र जित निकाल्यो । 

नेपाल अहिले दुई अंकसहित तालिकाको सातौं स्थानमा छ । यदि क्यानडा सिरिजमा चारवटै खेल जित्न सके नेपाली टिम दोस्रो स्थानमा उक्लिनेछ । यद्यपि क्यानडामा त्यो उपलब्धि हासिल गर्न नेपाललाई त्यति सहज छैन । किनकी विदेशी मैदानमा नेपालको रेकर्ड त्यति उत्कृष्ट छैन ।

नेपाललाई यसपालि क्यानडामा उत्कृष्ट प्रदर्शन गरेर लिग–२ तालिकामा व्यापक सुधार गर्ने चुनौती र मौका छ । किनकी नेपालले अक्टोबरमा थप बलियो टिमविरुद्ध लिग–२ श्रृंखला खेल्नेछ, उक्त सिरिजमा नेपालले आयोजक अमेरिका र स्कटल्याण्डको सामना गर्नेछ ।

यी दुई टिमसँग भिड्नुअघि नेपालले क्यानडामै त्रिकोणात्मक टी–२० सिरिज पनि खेल्नेछ, जसअन्तर्गत नेपालले २८ सेप्टेम्बर र १ अक्टोबरमा क्यानडा तथा २९ सेप्टेम्बर र २ अक्टोबरमा ओमानसँग खेल्ने तालिका छ । 

नेपाली टिमले तीन महिनापछि टी–२० सिरिज खेल्नेछ । नेपालले पछिल्लोपटक गत जुनमा आइसिसी टी–२० विश्वकप खेलेको थियो । त्यसयता नेपालले कुनै पनि अन्तर्राष्ट्रिय सिरिज खेलेको छैन ।  यस्तै, नेपालले गत फेब्रुअरीयता एकदिवसीय श्रृंखलामा प्रतिस्पर्धा गरेको छैन ।

त्यस्तै, ओमानले गत जुलाईयता अन्तर्राष्ट्रिय सिरिज खेलेको छैन । ऊ हाल लिग–२ तालिकाको छैटौँ स्थानमा छ । ओमानले चार म्याच खेल्दा दुईमा हार, एकमा जित र एक खेलमा अंक बाँडेको छ । ऊ गत संस्करणको लिग–२ मा दोस्रो भएको थियो । यसपालि भने ओमानले सोचेअनुसारको सुरुवात गर्न सकेन । 

यस्तै, क्यानडाले गत अगस्टमा ओडिआई र टी–२० सिरिज खेलेको थियो । यद्यपि उक्त दुवै सिरिजमा क्यानडाको प्रदर्शन कमजोर रह्यो । उसले उक्त लिग–२ श्रृंखलामा चारवटै खेलमा पराजय बेहोर्यो । यद्यपि क्यानडाले पहिलो सिरिजमा भने चारवटै खेल जित्दै सानदार सुरुवात गरेको थियो । लिग–२ तालिकामा ऊ अहिले तेस्रो स्थानमा छ । क्यानडाले आठ म्याच खेल्दा चारमा जित र चार खेलमा हार बेहोरेको छ ।

सन् २०२७ मा सकिने लिग–२ प्रतियोगितामा आठवटा टिमले प्रतिस्पर्धा गरिरहेका छन् । र, प्रत्येक टिमले ३६/३६ म्याच खेल्न पाउने छन् । नेपालले अब यस प्रतियोगितामा ३२ म्याच खेल्न बाँकी छ ।

नेपालले गत संस्करणको लिग–२ मा ३६ मध्ये १९ मा जित, १५ मा हार तथा दुई खेलमा अंक बाँड्यो । नेपाली टिम यसपालि उत्कृष्ट कमब्याक गर्दै पहिलो संस्करणको लिग–२ को स्थान हासिल गर्ने लक्ष्यमा छ ।