क्रिस्टियानो रोनाल्डो नेतृत्वको अल नासरले साउदी प्रो लिगमा अपराजित यात्रा कायमै राखेको छ । अपराजित यात्रालाई निरन्तरता दिनेक्रममा शनिबार राति सम्पन्न खेलमा नासरले अल–आरोबा एफसीविरुद्ध ३–० को सानदार जित निकाल्यो ।
साउदीको अल-अवल पार्कमा भएको खेलमा अल नासरको जितमा साडियो मानेले दुई तथा रोनाल्डोले एक गोल गरे । खेलको १७औँ मिनेटमा रोनाल्डोले पेनाल्टीमार्फत गोल गर्दै नासरलाई सुरुवाती अग्रता दिलाए ।
जारी सिजनको साउदी प्रो लिगमा रोनाल्डोको यो पाँचौं गोल हो । यस्तै, मानेले २९औँ मिनेटमा गोल गर्दै नासरलाई २–० को अग्रता दिलाए । उनले रोनाल्डोको असिस्टमा गोल गरेका हुन् । यस्तै, मानेले नै ७१औँ मिनेटमा गोल गर्दै नासरलाई ३–० को सहज जित दिलाए ।
यो जितपछि नासरले ६ खेलबाट १४ अंक जोडेको छ । उसले जारी सिजनमा ६ मध्ये चारमा जित र दुई खेलमा बराबरी खेलेको छ । नासर अहिले तालिकाको तेस्रो स्थानमा छ । ऊ शीर्ष स्थानको अल हिलालभन्दा ४ अंकले टाढा छ ।
अल हिलाल ६ खेलबाट १८ अंकसहित पहिलो नम्बरमा छ । ऊ गत संस्करण च्याम्पियन टिम हो । सन् २०२३/२४ को सिजनमा अल नासरले दोस्रो स्थान हासिल गर्यो । रोनाल्डो जारी सिजनमा भने नासरलाई च्याम्पियन बनाउने लक्ष्यमा छन् ।
नासरले २०१९ यता साउदी प्रो लिगको उपाधि जित्न सकेको छैन ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
