०८१ को सर्वाधिक प्रतीक्षित फिल्म ‘ह्रस्व दीर्घ’ रिलिज हुन ठ्याक्कै एक महिना बाँकी छ, अर्थात् यो फिल्म आगामी कार्तिक ३० गतेबाट सार्वजनिक प्रदर्शनमा आउँदै छ ।

रिलिज मिति नजिकिँदै गर्दा दसैँको अवसरमा फुलपातीको दिन फिल्मको निर्माण ब्यानर नीता फिल्मस्ले टिजर सार्वजनिक गर्दै प्रचारलाई गति दिएको छ । गत महिना फिल्ममा समावेश गीत सार्वजनिक गरिएको फिल्मको कथावस्तु थाहा पाउन दर्शक तथा शुभचिन्तकहरू टिजर ट्रेलरको प्रतीक्षामा थिए । टिजरले केही हदसम्म फिल्मले उठान गरेको विषयवस्तुलाई बुझाउने प्रयास गरेको छ, पूर्ण ट्रेलर भने आउन बाँकी छ ।

फिल्ममा समावेश भारतीय र नेपाली फिल्मका स्टारकास्ट, विश्वकै ठूलो फिल्म स्टुडियो ‘रामोजी फिल्म सिटी’को छायांकनलगायतले निर्माण घोषणादेखि ट्रेण्डिङमा रहेको टिजर सार्वजनिकसँगै चर्चा बटुलिरहेको छ ।

टिजरलाई युट्युबमा हालसम्म झण्डै सात लाखपटक हेरिएको छ । जहाँ २५ हजार बढी लाइक र २३ सय बढी प्रतिक्रिया छन् । झण्डै शतप्रतिशत सकारात्मक प्रतिक्रिया पाएको टिजर हेरेपछि दर्शकले फिल्मलाई हेर्नैपर्ने फिल्मको ‘बकेटलिस्ट’मा राखेका छन् ।

टिजरमा समावेश कलाकारको अभिनय, दृश्य, डायलग, ब्याकग्राउण्ड म्युजिक र सिनेमाटोग्राफीलाई सयौँ दर्शकले ‘रियाक्ट’गरेका छन् । नेपालदेखि भारत हुँदै पाकिस्तान र बंगलादेशसम्मका दर्शकले फिल्मको टिजरमा रियाक्सन भिडियो बनाउँदा उत्कृष्ट शब्द पस्केका छन् ।

फेसबुक र युट्युबमा ‘ह्रस्व दीर्घ टिजर’ सर्च गर्दा सयौँ भिडियो पाउन सकिन्छ । टिजरप्रति दर्शकले देखाएको चासो र व्यक्त गरेका प्रतिक्रियाले निर्माण टिम हौसिएको छ । निर्देशक चन्द्र पन्त, निर्माता अभिनेत्री नीता ढुंगाना र अभिनेता हरिहर अधिकारीले सामाजिक सञ्जालमा पोस्ट सेयर गर्दै आभार व्यक्त गरेका छन् । 
फिल्म उत्कृष्ट बनेको र दर्शकको भावना विपरीत नरहेको भन्दै कार्तिक ३० पर्खिन निर्देशक पन्तको सुझाव छ ।

दसैँको अवसरमा प्रदर्शनमा आएका फिल्मलाई हलमा हेर्ने दर्शकले टिजरलाई पनि एकसाथ हेर्न पाएका छन् । हलमा फिल्म हेर्ने दर्शकबाट पनि उत्कृष्ट रेस्पोन्स आएको छ, निर्माता रहेकी अभिनेत्री ढुंगाना भन्छिन्, ‘नेपाल र भारतीय फिल्मका दिग्गज कलाकार र प्राविधिकसहितको टिमबाट तयार ‘ह्रस्व दीर्घ’ले सबै वर्ग, समुदाय र भाषाका दर्शकको मन जित्नेमा आशावादी छु ।’ 

नेपालीसँगै भारतका विभिन्न भाषामा सार्वजनिक प्रदर्शनमा आउन लागेको फिल्मको प्रचारलाई यसै साताबाट थप आक्रामक बनाउने तयारीमा निर्माण टिम छ ।

निर्माता रहेकी अभिनेत्री नीता र हरिहरसँगै चर्चित दक्षिण भारतीय कलाकार ब्रह्मानन्दम, अलि, सुनिल बर्मा, कबिर दुहान बलिउड कलाकार प्रदीप रावतसँगै विपना थापा, गरिमा शर्मा, प्रशान्त ताम्राकार, सरोज खनाल, सञ्चिता लुइँटेल, बुद्धि तामाङ, किरण केसी, रवीन्द्र झालगायत नाम चलेका दर्जनभन्दा बढी कलाकारको अभिनय छ । अभिनेत्री रेखा थापाको सरप्राइज प्याकेज पनि यो फिल्ममा समावेश छ ।

फिल्मलाई भारतको रामोजी स्टुडियोदेखि मुम्बई, चितवन र काठमाडौंमा छायांकन गरिएको छ । अभिनेता हरिहर अधिकारीको कथामा बनेको फिल्मको पटकथा तथा संवाद लेखनमा प्रतीक पौडेल, निर्देशक पन्त र हरिहरले सहकार्य गरेका छन् । बलिउडका स्थापित सिनेमाटोग्राफर कविरलालको छायांकन छ भने ब्यांकटेस इन्टरटेनमेन्टले वितरण अधिकार लिएको छ ।