पुन समुदायका कुलदेवता करबाकेली बाबाका विषयमा गाइएका दुई ओटा भजन सार्वजनिक गरिएको छ। पुन समाज नेपालले मंगलबार काठमाडौंमा आयोजना गरेको कार्यक्रममा ‘करबाकेली बाबा, तिम्रै शरणमा छौं’ र ‘करबाकेली बाबाको आशीर्बाद’ शीर्षक भजन गीत सार्वजनिक गरिएको हो।
जी. पुन, बबिता पाख्रिन र दीपा तामाङको स्वरमा सजिएका भजनका सङ्गीतकार पनि जी. पुन नै हुन्। गीतकार भने चीनबहादुर पुन र राधा पुन हुन्। भजनको म्युजिक भिडियो पनि बनाइएको छ। काफल डाँडामा छायाङ्कन गरिएको भिडियोका निर्देशक पनि जी. पुन नै हुन्।
दुवै भजनको संयोजन समाजसेवी चामबहादुर पुनले गरेका हुन्। भजन सार्वजनिक कार्यक्रममा समाजका उपाध्यक्ष राजु पुन, समाजसेवी चामबहादुर, गायक जी. पुन, साहित्यकार प्रभा बराल, पत्रकार अमृत भादगाउँले लगायतले सम्बोधन गरेका थिए।
म्याग्दीको अन्नपूर्ण गाउँपालिका–८ काफल डाँडामा करबाकेली बाबाको भव्य थान छ। थानमा करबाकेली बाबा, हिमला, फिमला, रामचन र कुलचनका पूर्ण कदका मूर्ति छन्।
समाजसेवी चामबहादुरको अगुवाइमा करबाकेली थान, पुन समुदाय संग्रहालय, सामुदायिक पाहुनाघर निर्माणका साथै करबाकेली इको ट्रेक ब्रान्डिङ गरिएको छ। त्यसैले करबाकेली क्षेत्र पर्यटकीय गन्तव्यका रूपमा विकास भइसकेको छ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
