सूर्यदर्शन सहकारीको रकम ठगी प्रकरणमा सोमबार कास्की जिल्ला अदालतमा राष्ट्रिय स्वतन्त्र पार्टी (रास्वपा) सभापति रवि लामिछानेको तर्फबाट कानुन व्यवसायीले थुनछेक बहस गर्दै छन् ।   

जिल्ला न्यायाधीश नितिश राईको इजलासमा आजदेखि लामिछानेको तर्फबाट कानुन व्यवसायीले थुनछेक बहस गर्न लागेका हुन् । यसअघि सोही प्रकरणमा पूर्वडिआइजी छविराज जोशी र लिला पछाईको तर्फबाट थुनछेक बहस भइसकेको छ ।

सोही प्रकरणमा पक्राउ परेका कृष्णबहादुर गुरुङ, उनकी छोरी एमाले नेत्री एवं गण्डकी प्रदेश सभाकी पूर्वसांसद मीना गुरुङ, अनिता गुरुङ र रामबहादुर खनालको थुनछेक बहस हुन् बाँकी रहेको छ ।  

यसैबीच रास्वपा सभापति लामिछानेका तर्फबाट कास्की जिल्ला अदालतमा थुनछेक बहसमा सहभागी कानुन व्यवसायी यज्ञमणि न्यौपानेले सहकारी पीडितले बचत रकम फिर्ता नपाउने परिस्थिति बन्दै गएको बारे इजलासमा कुरा उठ्न थालेको बताए । 

सहकारी पीडितले बचत रकम फिर्ता पाउनुपर्ने मागसहित सर्वत्र आन्दोलन चलिरहेका बेला सहकारी पीडितले आफ्नो बचत रकम नपाउने परिस्थिति बन्दै गइरहेको बारे इजलासमा छलफल भएको अधिवक्ता न्यौपानेले बताए ।  

अहिले लामिछानेलगायतलाई लगाइएको संगठित अपराध र सम्पत्ति शुद्धीकरण सम्बन्धी मुद्दाका कारण सहकारी पीडितले रकम फिर्ता पाउने परिस्थिति नरहेको कतिपय कानुन व्यवसायीले बताउँदै आएका छन् ।  

प्रतिवादीतर्फका कानुन व्यवसायीहरूको बहस सकिएपछि पुनः सरकारी वकिलको तर्फबाट जवाफी बहस सुरु हुनेछ । थुनछेक बहसपछि प्रतिवादीलाई पुर्पक्षका लागि थुनामा राखेर अनुसन्धान गर्ने कि थुनामुक्त गरेर अनुसन्धान जारी राख्ने आदेश हुनेछ । 

यही ७ पुसमा जिल्ला सरकारी वकिलको कार्यालयले सहकारीको रकम अपचलनको आरोपमा रास्वपा सभापति लामिछानेसहित ४४ जनाविरुद्ध मुद्दा दायर गरेको थियो । 

सभापति लामिछानेमाथि सहकारी ठगीसँगै सङ्गठित अपराध र सम्पत्ति शुद्धीकरण कसुरमा समेत मुद्दा दायर भएको छ । सरकारी वकिलको कार्यालयले सूर्यदर्शन सहकारीको रकम ठगी प्रकरणमा अहिलेसम्म ६३ जनाविरुद्ध जिल्ला अदालत कास्कीमा मुद्दा दायर गरिएको छ । 

सभापति लामिछानेसहित १९ जनाविरुद्ध सङ्गठित अपराधमासमेत मुद्दा चलाइएको  जिल्ला सरकारी वकिलको कार्यालयले जनाएको छ । यस्तै, लामिछानेसँगै खनाल, जोशी र पछाईँविरुद्ध सम्पत्ति शुद्धीकरणमा पनि मुद्दा दायर गरिएको सरकारी वकिलको कार्यालयले जनाएको छ ।