जय ट्रफी पुरुष एलिट कपको उपाधिका लागि आज विभागीय क्लब नेपाल पुलिस र त्रिभुवन आर्मी क्लब खेल्दै छन् । 

यी दुई टिमबीचको फाइनल खेल वीरगन्जस्थित नारायणी क्रिकेट मैदानमा बिहान ९ बजेदेखि सुरु हुनेछ । फाइनल खेल तीनदिवसीय ढाँचामा हुनेछ ।

लिग चरणमा पुलिस शीर्ष र आर्मी दोस्रो स्थानमा रहेका थिए । पुलिसले तीनमध्ये दुईमा जित र एक खेल बराबरी खेल्यो । आर्मीले तीनमध्ये दुईमा बराबरी र एक खेलमा जित निकालेको थियो ।  

लिग चरणमा पुलिसले मधेश र बागमती प्रदेशलाई हराउँदा आर्मीसँग बराबरी खेल्यो । यता आर्मीले बागमती र पुलिससँग बराबरी खेल्दा मधेशलाई हरायो ।  

२१ पुसदेखि सुरु भएको प्रतियोगितामा गत संस्करणको प्रधानमन्त्री कप राष्ट्रिय प्रतियोगिताका शीर्ष चार टिमको सहभागिता थियो । सिङ्गल राउण्ड रोबिनका आधारमा भएको लिगमा कुल ६ खेल भएका थिए ।  

लिग चरणमा उत्कृष्ट प्रदर्शन गर्ने पाँच खेलाडी  

लिग चरणको खेल समाप्त हुँदा बलिङतर्फ सर्वाधिक सफल खेलाडीको सूचीमा नम्बर वानमा छन्, देब्रेहाते स्पिनर साहब आलम । आर्मी क्लबबाट लिग खेलिरहेका उनले तीन म्याचमा २.८५ को इकोनमीमा २१ विकेट लिइसकेका छन् । 

साहले अझै एउटा म्याच खेल्न बाँकी छ । उनीसामु चार खेलमा ३० विकेट पूरा गर्ने मौका छ । 

जय ट्रफीमा साहबको उत्कृष्ट बलिङ ५९ रन दिएर ८ विकेट लिनु हो । उनी यस प्रतियोगितामा एकै इनिङमा ८ विकेट लिने एक्लो बलर हुन् । पहिलोपटक रेड बल क्रिकेट खेलिरहेका साहबले डेब्यू प्रतियोगितामै प्रभावित पारिरहेका छन् । यस्तै, सर्वाधिक विकेट लिने मामलामा पुलिस क्लबमा आबद्ध बायाँहाते स्पिनर ललितनारायण राजवंशी दोस्रो स्थानमा छन् । 

उनले तीन म्याच खेल्दा २.७८ को इकोनमीमा १९ विकेट लिएका छन् । जय ट्रफीमा ललितको उत्कृष्ट बलिङ ४७ रन दिएर ७ विकेट लिनु हो । उनीसामु फाइनलमा साहबलाई पछि पार्ने मौका छ । 

त्यस्तै, यो सूचीको तेस्रो स्थानमा बागमती प्रदेशका कप्तान सन्दीप लामिछाने रहेका छन् । उनले तीन म्याचमा ४.६० को इकोनमीमा १८ विकेट लिए । प्रतियोगितामा सन्दीपको उत्कृष्ट बलिङ ४१ रन दिएर ५ विकेट लिनु हो ।  

ब्याटिङतर्फ जय ट्रफीको लिग चरणमा मधेश प्रदेशका ओपनर मयन यादव सर्वाधिक सफल रहे । टिम जितविहीन बने पनि उनको व्यक्तिगत प्रदर्शन भने उत्कृष्ट रह्यो । १९ वर्षीय मयनले तीन खेलमा एक शतक र एक अर्धशतकको मद्दतमा सर्वाधिक २ सय ६८ रन बनाए । 

उनी जय ट्रफीमा शतक हिर्काउने एक्लो ब्याटर हुन् । मयनले उक्त शतकीय पारी बागमती प्रदेशविरुद्ध खेलेका थिए । यस्तै, उनले विभागीय क्लब आर्मी र पुलिसविरुद्ध पनि राम्रो प्रदर्शन गरे । 

त्यस्तै, लिग चरणमा सर्वाधिक रन बनाउने सूचीमा दोस्रो स्थानमा पुलिसमा आबद्ध अमित श्रेष्ठ रहे । उनले ५ इनिङ्समा दुई अर्धशतकको सहयोगमा २ सय २४ रन बनाए ।  

लिग चरणको अन्तिम खेलमा बागमतीविरुद्ध दुवै इनिङमा अर्धशतकीय पारी खेलेका थिए ।