मलेसियामा जारी आइसिसी यू–१९ महिला टी–२० विश्वकपमा नेपालले आज स्कटल्याण्डसँग खेल्दैछ । पहिलो खेलमा बंगलादेशसँग ५ विकेटले पराजित भएको नेपाल आज दोस्रो खेलमा स्कटल्याण्डसँग भिड्न लागेको हो ।
यी दुई टिमबीचको खेल दिउँसो १२ः१५ बजे सुरु हुनेछ । विश्वकपमा नेपाल समूह ‘डी’ मा परेको छ । यस समूहमा बंगलादेशसँगै अस्ट्रेलिया र स्कटल्याण्ड छन् ।
पूजा महतोको कप्तानीमा नेपाली टिम विश्वकप खेल्न मलेसिया पुगेको हो । पहिलो खेलमा पराजित नेपाल र स्कटल्याण्डले दोस्रो खेल खेलिरहेका हुन् । समूह ‘डी’मा रहेका दुवै देश पहिलो जितको खोजीमा छन् ।
पहिलो खेलमा नेपालले बंगलादेशविरुद्ध ५ विकेटको पराजय बेहोरेको थियो ।
उक्त खेलमा टस हारेर ब्याटिङको मौका पाएको नेपाल १८.२ ओभरमा ५२ रनमै अलआउट भो । त्यस खेलमा नेपाली ब्याटर हतारिएको मानसिकताबाट प्रस्तुत भए । र, बंगलादेशविरुद्ध ५ नेपाली ब्याटर रनआउटको सिकार हुन पुगे ।
डेब्यू विश्वकप भएर पनि होला खेलाडी केही आत्तिएका देखिन्थे । नेपालले अब स्कटल्याण्डविरुद्ध त्यो गल्ती दोहोर्याउनु हुँदैन ।
स्कटल्याण्डविरुद्ध जित निकाल्न सके नेपालले सुपर सिक्समा स्थान बनाउने सम्भावना बलियो हुनेछ ।
यदि सोमबार हार बेहोरेमा नेपालको सुपर सिक्स यात्रा निकै कठिन बन्नेछ । त्यसो भएमा नेपालले अन्तिम खेलमा अस्ट्रेलियालाई हराउनैपर्ने समीकरण बन्न सक्छ । त्यसकारण नेपाली टिमले स्कटल्याण्डलाई हराउन कुनै कसर बाँकी राख्ने छैन ।
हालसम्म यी दुई टिमले महिला क्रिकेटमा एकअर्काको सामना गरेका छैनन् । सोमबार नेपाल र स्कटल्याण्ड पहिलो भेटमै जित निकालेर इतिहास रच्ने योजनामा पनि हुने छन् ।
यस विश्वकपमा १६ टोलीको सहभागिता रहेको छ । १६ टोलीलाई चार समूहमा विभाजन गरिएको छ । प्रत्येक समूहबाट समान तीन/तीन टोली सुपर–६ मा पुग्नेछन् । सुपर–६ मा दुई समूहमा प्रतिस्पर्धा हुनेछ ।
दुवै समूहका शीर्ष दुई/दुई टोलीले सेमिफाइनलको यात्रा गर्ने छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
