आइसिसी यू–१९ महिला विश्वकप क्रिकेटअन्तर्गत दोस्रो खेलमा नेपालले स्कटल्याण्डलाई ७४ रनको लक्ष्य दिएको छ । मलेसियाको युकेएम ओभलमा टस जितेर ब्याटिङ रोजेको नेपाल १८.५ ओभरमा ७३ रनमा अलआउट भयो ।
नेपालका लागि कप्तान पूजा महतोले ४३ बलमा तीन चौकासहित सर्वाधिक २७ रन जोडिन् । यस्तै, सावित्रा धामीले ११ बलमा १० रन बनाइन् । बाँकी ब्याटरले भने दोहोरो अंकमा समेत रन जोड्न सकेनन् ।
स्कटल्याण्डका लागि माइसी मासिराले घातक बलिङ गरिन् । उनले ३.५ ओभरमा १५ रन दिएर सर्वाधिक ५ विकेट लिइन् ।
नेपालले आज प्लेइङ–११ मा दुई खेलाडी परिवर्तन गरिएको छ । आजको खेलमा नेपालले सोनी पाख्रिन र तृष्णा विकलाई विश्राम दिएर ज्योत्सिका मरासिनी र कृष्मा गुरुङले मौका पाएका हुन् ।
पहिलो खेलमा पराजित नेपाल र स्कटल्याण्ड दुवै पहिलो जितको खोजीमा छन् । नेपाल पहिलो खेलमा बंगलादेशसँग ५ विकेट तथा स्कटल्याण्ड अस्ट्रेलियाविरुद्ध ९ विकेटले पराजित भएको थियो ।
स्कटल्याण्डविरुद्ध जित निकाल्न सके नेपालले सुपर सिक्समा स्थान बनाउने सम्भावना बलियो हुनेछ ।
यदि सोमबार हार बेहोरेमा नेपालको सुपर सिक्स यात्रा निकै कठिन बन्नेछ । त्यसो भएमा नेपालले अन्तिम खेलमा अस्ट्रेलियालाई हराउनैपर्ने समीकरण बन्न सक्छ । त्यसकारण नेपाली टिमले स्कटल्याण्डलाई हराउन कुनै कसर बाँकी राख्ने छैन ।
हालसम्म यी दुई टिमले महिला क्रिकेटमा एकअर्काको सामना गरेका छैनन् । सोमबार नेपाल र स्कटल्याण्ड पहिलो भेटमै जित निकालेर इतिहास रच्ने योजनामा पनि हुने छन् ।
यस विश्वकपमा १६ टोलीको सहभागिता रहेको छ । १६ टिमलाई चार समूहमा विभाजन गरिएको छ । प्रत्येक समूहबाट समान तीन/तीन टोली सुपर–६ मा पुग्नेछन् ।
सुपर–६ मा दुई समूहमा प्रतिस्पर्धा हुनेछ । दुवै समूहका शीर्ष दुई/दुई टिमले सेमिफाइनलमा प्रतिस्पर्धा गर्ने छन् ।
नेपालको प्लेइङ–११ : साना प्रविन, सावित्रा धामी, पूजा महतो (कप्तान), कृष्मा गुरुङ, किरनकुमारी कुँवर, अलिशाकुमारी यादव, ज्योत्सिका मरासिनी, रिया शर्मा, सिमाना केसी, रचना चौधरी र अनु कडायत ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
