तेस्रो संस्करणको इन्टरनेशनल लिग टी–२० (आईएल टी–२०) को २४औँ खेलमा डेजट भाइपर्स र गल्फ जायन्ट्स खेल्दै छन् । नेपाली अलराउन्डर कुशल मल्ल र दीपेन्द्र सिंह ऐरीआबद्ध यी दुई टिमबीचको खेल आज राति ८ः१५ देखि सुरु हुनेछ ।  

यूएईमा जारी यस लिगमा अहिलेसम्म कुशलसम्मिलित डेजर्ट उच्च लयमा छ । उसले ८ म्याच खेल्दा ६ मा जित र २ खेलमा मात्र हार बेहोरेको छ । डेजर्टले प्लेअफमा स्थान सुरक्षित गरिसकेको छ ।

ऊ अब शीर्ष दुईमा रहेर क्वालिफायर वान खेल्ने अभियानमा छ । डेजर्टले त्यो लक्ष्य ढुक्कका साथ पूरा गर्न एक जित निकाले पुग्छ । पछिल्लो खेलमा लज्जास्पद प्रदर्शन गरेको ऊ आफ्नो नवौँ खेलमा उत्कृष्ट पुनरागमन गर्ने सोचमा छ ।

आफ्नो आठौँ खेलमा डेजर्टले एमआई इमिरेट्ससँग १५४ रनको फराकिलो हार बेहोरेको थियो । त्यस खेलमा एमआईले दिएको २२९ रनको लक्ष्य पछ्याएको डेजर्ट १२.३ ओभरमा ७४ रनमै अलआउट भयो ।

यदि त्यो खेलमा डेजर्टले जित निकालेको भए कुशलले बुधबारको खेलमा डेब्यू गर्ने सम्भावना बलियो थियो । तर, टिम पराजित भएकाले उनको डेब्यू सम्भावना धकेलिएको छ ।

यदि बुधबार डेजर्ट विजयी हुन्छ भने लिग चरणको अन्तिम खेलमा कुशलले आईएल टी–२० मा डेब्यू पाउन सक्छन्, टिम पराजित भएमा फेरि उनी बेन्चमै सीमित हुने सम्भावना छ । लिग चरणको पहिलो भेटमा गल्फले डेजर्टविरुद्ध ६ विकेटको हार बेहोरेको थियो । ऊ आज उक्त हारको बदला लिँदै आफ्नो लय कायम राख्ने सोचमा छ । 

दीपेन्द्रको डेब्यू सम्भावना कति ? 

अर्का नेपाली अलराउन्डर दीपेन्द्र सिंह ऐरीले पनि बुधबार डेब्यू गर्न पाउने सम्भावना कम छ । पछिल्लो दुई खेलमा लगातार जित निकालेकाले गल्फ जायन्ट्स प्लेइङ–११ मा धेरै परिवर्तन गर्ने सोचमा छैन । प्लेअफमा स्थान बनाउन ऊ बाँकी तीनवटै खेलमा जित निकाल्नुपर्ने दबाबमा छ ।

जायन्ट्स अहिले ६ अंकसहित तालिकाको पाँचौं स्थानमा छ । ऊ फ्रेन्चाइज लिगको बढी अनुभव भएका खेलाडीलाई विश्राम दिएर दीपेन्द्रलाई डेब्यू गराउने मनस्थितिमा देखिँदैन । उनले डेब्यू नपाउनुको अर्को कारण हो, एसोसियट र यूएईका खेलाडीको राम्रो प्रदर्शन । आईएल टी–२० को नियमअनुसार प्लेइङ–११ मा ९ जना विदेशी खेलाडी हुनुपर्छ । 

यस्तै, दुईजना क्रमशः यूएई र एसोसियट प्लेयर हुनुपर्ने नियम छ । त्यो दुई जनाको कोटामा घरेलु खेलाडीको रूपमा आयन अफ्जल खान र एसोसियट प्लेयरको रूपमा नामिबियाका कप्तान जेरार्ड इरास्मसले खेलिरहेका छन् । उनीहरू राम्रो लयमा पनि छन् ।

यदि अब गल्फले तीनमध्ये बाँकी दुई खेलमा लगातार पराजय बेहोर्छ भने चाहिँ दीपेन्द्रले अन्तिम म्याचमा आईएल टी–२० मा डेब्यू गर्न पाउन सक्छन् । अन्यथा उनी यसपालि पनि एउटा म्याच नखेलेरै घर फर्किने सम्भावना छ ।