इजरायली सेना र हमास विद्रोही समूहबीचको तनाव बढेसँगै प्यालेस्टाइनको गाजामा एक सातादेखि रकेट युद्ध जारी छ । यसक्रममा इजरायली सेनाको आक्रमणबाट गाजाका भौतिक संरचनामा अत्यधिक क्षति पुगेको छ ।
हमासको कब्जामा रहेको गाजामा इजरायली सेनाले लगातार रकेट बम प्रहार गरिरहेको छ । यसैक्रममा सेनाको प्रहारबाट गाजामा अन्तर्राष्ट्रिय मिडिया अलजजिरा र एसोसिएट प्रेसको कार्यालय रहेको भवन पूर्णरुपमा ध्वस्त भएको छ ।
इजरायली सेनाको रकेट आक्रमणमा परेर शनिबार अलजजिरा र एपीको कार्यालय रहेको १५ तले भवन ध्वस्त भएको हो । इजरायली सेनाले भने उक्त भवनमा हमासको पनि कार्यालय रहेकाले आक्रमण गरेको जनाएको छ ।
⭕ LIVE footage of the moment an Israeli air raid bombed the offices of Al Jazeera and The Associated Press in Gaza City ⬇️
— Al Jazeera English (@AJEnglish) May 15, 2021
🔴 LIVE updates: https://t.co/RvtP1lEX1x pic.twitter.com/RBO1ZiDAl0
सेनाले आक्रमण गर्नुभन्दा पहिला नै भवन छोड्न चेतावनी दिएकाले उक्त भवनमा रहेका पत्रकारहरू सुरक्षित स्थानमा गइसकेको हुँदा उनीहरुको अवस्था सुरक्षित रहेको बताइएको छ । उक्त भवनमा हमास समूहको कुनै कार्यालय नभएको पनि दाबी गरिएको छ ।
इजरायली सेनाको आक्रमणबाट आफ्नो कार्यालय रहेको भवन ढल्दै गरेको दृश्य अलजजिरा टेलिभिजनले प्रत्यक्ष प्रसारण गरेको थियो । इजरायली आक्रमणको उसकै नागरिकले पनि विरोध गर्दै आएका छन् ।
आज बिहान पनि इजरायली सेनाले हमास प्रमुखका घरमा आक्रमण गरेको अन्तर्राष्ट्रिय सञ्चारमाध्यमले जनाएका छन् । सन् २०१७ देखि हमासको राजनीतिक र सैन्य विभाग प्रमुख रहेका येहा अल सिनवारको घरमा आक्रमण गरिएको समाचारमा जनाइएको छ ।
इजरायलको आक्रमणमा परी अहिलेसम्म गाजामा ४१ जना बालबालिकासहित १४९ जनाले ज्यान गुमाएका छन् । हमासको आक्रमणबाट इजरायलतर्फ २ बालबालिकासहित १० जनाको मृत्यु भएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
