ललितपुरको सानेपामा एक जनाको शव फेला परेको छ । सानेपास्थित गुसिटोल राम मन्दिर नजिकै फ्ल्याट लिएर बस्दै आएका ५९ वर्षीय सत्यनारायण तमिलीको शव फेला परेको हो । उनको मृत्युलाई प्रहरीले शंकास्पद भनेको छ ।
दुई तले घरको दोस्रो तलमा उनको शव फेला परेको थियो । घटनास्थलमा अनुसन्धानका लागि तालिमप्राप्त कुकुरसहितको प्रहरी टोली पुगेको छ ।
भारतीय नागरिक सत्यनारायण न्युरोडस्थित एटलान्टिक कम्प्युटर प्रालिमा काम गर्दै आएका थिए ।
प्रारम्भिक अनुसन्धानमा उनको हत्या भएको हुन सक्ने देखिएको ललितपुर प्रहरी प्रमुख एसएसपी किरण बज्राचार्यले जानकारी दिइन् । घटनास्थलमा हम्मर पनि भेटिएको र टाउकोमा चोट देखिएकाले हत्या गरिएको हुनसक्ने एसएसपी बज्राचार्यले बताइन् ।
मृतक तमिलीको फ्ल्याटमा एक महिला काम गर्न आउने गरेकी थिइन् । ती महिला दिनदिनै आएर खाना बनाइदिएर जाने गरेकी थिइन् ।
शुक्रबार खाना खुवाएर फर्किएकी महिला शनिवार बिहान खाना बनाउन आउँदा ढोका बन्द थियो । भित्रबाट च्यानल गेट बन्द भएपछि उनले फोन गरेकी थिइन् । तर, फोन नउठेपछि फर्किएको बयान प्रहरीलाई दिएकी छन् ।
एसएसपी बज्राचार्यका अनुसार ती महिलाले आज बिहान पनि ढोका नखुलेपछि स्थानीयको सहयोगमा प्रहरीलाई खबर गरेकी थिइन् ।
प्रहरी गएर हेर्दा उनको शव घोप्टो परेको अवस्थामा फेला परेको थियो । उनको हत्या गरिएको आशंकामा प्रहरीले अनुसन्धान अगाडि बढाएको एसएसपी बज्राचार्यले बताइन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
