काठमाडौंमा एक श्रीमानले पारिवारिक विवादमा आफ्नै श्रीमतीको हत्या गरेका छन् । चाबहिलस्थित गुह्येश्वरी मन्दिर नजिकै बस्ने श्रीमानले श्रीमतीको हत्या गरेका हुन् ।
पारिवारिक विवादका कारण ३९ वर्षीय श्रीमान राम श्रेष्ठले २३ वर्षकी श्रीमती रञ्जना तामाङको हत्या गरेको गौशाला प्रहरीले जनाएको छ ।
विवाद बढ्दै गएपछि बिहान साढे सात बजे घाँटी थिचेर हत्या गरेको श्रीमान श्रेष्ठले प्रहरीसँगको बयानमा स्वीकार गरेका छन् । प्रहरीमा उनको बयान छ, ‘पारिवारिक विवाद थियो, आज बढी भयो । रिस उठेर हत्या गरेँ, अनि त्यसपछि आफ्नो बायाँ हात चक्कुले काटेँ ।’
हत्या गरेको डेढ घण्टापछि श्रेष्ठले प्रहरीको हटलाइन १०० नम्बरमा फोन गरेर आफूले श्रीमतीको हत्या गरेको जानकारी गराएका थिए ।
सूचना पाउनासाथ घटनास्थलमा प्रहरी टोली पुग्दा श्रेष्ठ कोठाभित्र चुकुल लगाएर बसेको अवस्थामा फेला परेका थिए भने बेडमा रञ्जनाको शव भेटिएको थियो ।
मकवानपुरको हेटौंडा घर भएका श्रेष्ठ हाल काठमाडौंको चाबहिल बस्दै आएका थिए ।
प्रहरीको प्रारम्भिक अनुसन्धानमा श्रेष्ठको राजधानीमा मोटरसाइकलको ‘रिकन्डिसन’ सोरुम रहेको खुलेको छ ।
मृतक रञ्जना ६ महिनाकी गर्भवती पनि रहेको प्रहरी अनुसन्धानमा पाइएको छ । उदयपुरकी रञ्जनासँग करिब एक वर्ष अगाडि मात्रै श्रेष्ठले विवाह गरेक थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
