नेपाली क्रिकेट टिमका पूर्वकप्तान सन्दीप लामिछानेले पछिल्लो एक वर्षको अवधिमा जीवनमा विभिन्न आरोह–अवरोहको सामना गरे । सधैं मैदानभित्र बलिङका कारण चर्चाको शिखरमा रहने उनी एक वर्षयता भने प्रदर्शनका साथै बलात्कार आरोपका कारण चर्चामा रहे ।
ठूलो मानसिक तनावका बाबजुद सन्दीपले आफ्नो बलिङबाट नेपाललाई महत्वपूर्ण सफलता दिलाउन भने कुनै कसर बाँकी राखेनन् । त्यसको ज्वलन्त उदाहरण हो उनले २०२३ मा गरेको प्रदर्शन ।
नेपालले विश्वकपमा पुग्न होस् वा एकदिवसीय विश्वकप छनोट र एसिया कप खेल्न । सन् २०२३ मा नेपाल ठूला प्रतियोगितामा छनोट हुनुमा सन्दीपको भूमिका पनि प्रमुख रह्यो । त्यसलाई थप पुष्टि गर्न उनले यस वर्ष गरेको प्रदर्शनलाई हेर्दा काफी हुन्छ ।
सन्दीपले २०२३ मा २१ एकदिवसीय खेल्दा ४.८५ को इकोनमीमा ४३ विकेट लिएका छन् । उनले यो वर्ष दुई खेलमा चार–चार तथा एक खेलमा ५ विकेट लिए । २०२३ मा सन्दीप एकदिवसीयमा सर्वाधिक विकेट लिने मामलामा चौथो स्थानमा छन् ।
नेपालको तर्फबाट भने उनी पहिलो नम्बरमा रहे । यो वर्ष ओडिआईमा सर्वाधिक विकेट लिने सूचीमा सन्दीपभन्दा अगाडि कुलदीप यादव, मोहम्मद सिराज र मोहम्मद शामी मात्र रहेका छन् ।
२०२३ मा कुलदीपले ४८, सिरिजले ४४ र शामीले ४३ विकेट लिएका हुन् । यस वर्ष सन्दीप शाहिन साह अफ्रिदी, हरिस रौफ, एडम जाम्पा, मेहश थिक्क्षणालगायत स्टार बलरभन्दा अगाडि छन् ।
सन्दीपले यही वर्ष एकदिवसीय क्रिकेटमा सर्वाधिक छिटो एक सय विकेट पूरा गर्ने विश्वकीर्तिमान पनि बनाए । उनले ४२ खेलमै यो उपलब्धि हासिल गरेका हुन् ।
यसअघि एकदिवसीयमा सर्वाधिक छिटो १ सय विकेट लिने रेकर्ड राशिद खानको नाममा थियो । उनले ४४ खेलमा सो उपलब्धि हासिल गरेका थिए । टी–२० अन्तर्राष्ट्रियमा पनि सन्दीपलाई सर्वाधिक एक सय विकेट लिने मामलामा राशिदको रेकर्ड बराबरी गर्ने मौका छ ।
हालसम्म उनले ५२ खेलमा ९८ विकेट लिएका छन् । राशिदले ५३ खेलमा १ सय विकेट पूरा गर्दै विश्वकीर्तिमान बनाएका थिए । नेपालले २०२३ को डिसेम्बरमा अन्तर्राष्ट्रिय क्रिकेट खेल्ने तालिका नभएकाले सन्दीप अर्को वर्ष मात्र राशिदको रेकर्ड बराबरी गर्न सक्छन् ।
एकदिवसीयमा समग्र प्रदर्शनको कुरा गर्दा हालसम्म लामिछानेले ५० इनिङमा ४.३७ को इकोनमीमा ११२ विकेट लिएका छन् । उनी नेपालको तर्फबाट एकदिवसीय र टी–२० मा सर्वाधिक विकेट लिने बलर हुन् । सन्दीपलाई दुवै फरम्याटमा करण केसीले पछ्याइरहेका छन् । उनले हालसम्म एकदिवसीयमा ७४ र टी–२० मा ७९ विकेट लिएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।