वेस्ट इण्डिज ‘ए’ टी–२० सिरिजको चौथो खेलमा नेपाललाई तेस्रो सफलता मिलेको छ । नेपाललाई तेस्रो सफलता पनि कुशल भुर्तेलले नै दिलाए । उनले १३.२ ओभरमा केसी कार्टीलाई ४ रनमा क्याच आउट गराए ।
कुशलले नै नेपाललाई दोस्रो सफलता दिलाए । उनले १०औँ ओभरको अन्तिम बलमा जोनसन चार्ल्सलाई ५८ रनमा क्याच आउट गराए । नेपाललाई पहिलो सफलता युवा तीव्र गतिका बलर प्रतिश जिसीले दिलाए । नेपाललाई पहिलो सफलता दिलाउनेक्रममा प्रतिशले १.१ ओभरमा उपकप्तान एलिक एथेनाजेलाई ५ रनमा क्याच आउट गराए ।
कीर्तिपुरस्थित त्रिवि मैदानमा जारी खेलमा नेपालले आज पनि टस हारेर पहिला बलिङ गर्ने मौका पाएको हो । नेपालले आज प्लेइङ–११ मा आठ खेलाडी परिवर्तन गरेको छ ।
नेपालले चौथो खेलमा विनोद भण्डारी, अनिलकुमार साह, आरिफ शेख, कमलसिंह ऐरी, लोकेश बम, करण केसी, सागर ढकाल र विवेक यादवलाई बेन्चमा राखेर रोहितकुमार पौडेल (कप्तान), आसिफ शेख, कुशल भुर्तेल, सोमपाल कामी, अविनाश बोहरा, सन्दीप जोरा, ललितनारायण राजवंशी र प्रतिश जिसीलाई मौका दिएको हो ।
विश्वकपका लागि नेपालले टोली घोषणा गरिसकेकाले आजको खेलमा प्लेइङ–११ मा व्यापक परिवर्तन गरिएको हो । सिरिजमा नेपाल २–१ ले पछि छ । सिरिजमा जीवित रहन नेपाललाई आज जित्नैपर्ने दबाब छ ।
नेपालले पहिलो खेलमा ४ विकेटले वेस्ट इण्डिजलाई हराए पनि त्यसपछिको दुई खेलमा भने लगातार हार बेहोर्यो । नेपाल आज जित निकालेर उत्कृष्ट कमब्याक गर्न चाहन्छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
