आठ महिनाअघि दुर्घटनामा परेको यति एयरलायन्सको जहाजबारेको छानबिन गर्न गठित जाँचबुझ आयोगले बिहीबार संस्कृति पर्यटन तथा नागरिक उड्डयनमन्त्री सुदन किरातीलाई प्रतिवेदन बुझाएको छ । पोखरा अन्तर्राष्ट्रिय विमानस्थल नजिकै भएको सो दुर्घटनामा परेर ७२ जनाको घटनास्थलमै मृत्यु भएको थियो ।
०७९ माघ १ गते काठमाडौंबाट पोखराका लागि उडेको एटिआर विमान दुर्घटनाबारे विस्तृत जाँचबुझ गरी बनाइएको अन्तिम प्रतिवेदनको मस्यौदा मन्त्री किरातीलाई बुझाइएको हो ।
आयोगका सदस्यसचिव बुद्धिसागर लामिछानेका अनुसार अन्तर्राष्ट्रिय उड्डयन संगठन (आइकाओ)को प्रावधानअनुसार यस घटनासँग सरोकार राख्ने विभिन्न मुलुकको अन्तिम सुझाव प्राप्त भएको ६० दिनपछि प्रतिवेदन सार्वजनिक गरिनेछ ।
सो जहाज प्राविधिक कारणले दुर्घटना नभएर चालक दलका सदस्यको लापरबाहीले भएको प्रतिवेदनमा उल्लेख छ ।
घटनालगत्तै सरकारले पूर्वसचिव नगेन्द्र घिमिरेको संयोजकत्वमा ५ सदस्यीय दुर्घटना जाँचबुझ आयोग गठन गरेको थियो । आयोगले यसअघि प्रारम्भिक प्रतिवेदन सार्वजनिक गर्दै यतिको दुर्घटना मानविय (चालक दल)का कारण भएको जनाएको थियो ।
पोखरा विमानस्थलमा अवतरणका क्रममा भएको उक्त घटनामा चालकदलका ४ सदस्य र ६८ यात्रु थिए । सबैको घटनास्थलमै मृत्यु भएको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
