logo-img

संचारमन्त्री शर्माको सुझाव- मिडियाले सरकार र जनताबिचको पुलको काम गर्नुपर्छ

सञ्चार तथा सूचना प्रविधिमन्त्री रेखा शर्माले सरकारी स्वामित्वका मिडियाहरूले सरकार र जनताबिचको पुलको काम गर्नुपर्ने बताएकी छन् । सोमबार गोरखापत्र प्रकाशनको १२४ औँ वर्ष प्रवेश तथा संस्थानको ६२ औँ वार्षिकोत्सव समारोहमा उनले संविधानमा मौलिक हकमा राम्रो व्यवस्था रहे पनि कार्यान्वयन हुन नसकेको भन्दै यसबारे पनि सरकारी मिडियाहरूले सचेतनाको पक्षमा भूमिका खेल्नुपर्ने बताइन् । 

उनले भनिन्, ‘राज्यबाट सम्पन्न भएका नीति, नियम जनताका बीचमा पुर्‍याउने र जनताका गुनासा र अपेक्षाहरू सरकारसम्म पुर्‍याउने गरेर सरकारी मिडियाहरूले आफ्नो भविष्य निर्धारण गर्नुपर्छ । हामीले संविधानमा मौलिक हकका धेरै राम्रा व्यवस्था गरेका छौ । जातीय छुवाछुत, लैङ्गिक समानतालगायतका थुप्रै विषयहरू हामीले संविधानमा राखेका छौ । तर त्यो कुरा आजका दिनसम्म पनि व्यवहारिक रूपमा कायम भइरहेको छैन । यसको कारणहरू पत्ता लगाएर बाहिर ल्याउने पनि सरकारी मिडियामार्फत जनसमक्ष लान सकियो भने यसले हाम्रो सचेतनाको पक्षमा पनि राम्रो भूमिका खेल्न सक्छ ।’ 

उनले गोरखापत्रलाई व्यवस्थित बनाउन र अगुवा बनाउन यसका गुणका आधारमा स्थापित गर्न नयाँ ढङ्गको जनशक्ति आवश्यक भएको भन्दै गोरखापत्रको संरचनात्मक अवस्था, भौतिक पूर्वाधार र जनशक्ति व्यवस्थापनको लेखाजोखा गर्न आवश्यक भएको पनि बताइन् । 

उनले भनिन्, ‘यसलाई बजारमा स्थापित गर्न नयाँ तरिकाको जनशक्ति, क्रियाकलाप, कार्यक्रमहरू आवश्यक छ । यसमा गम्भीर भएर छलफल गर्न आवश्यक छ । गोरखापत्रको संरचनात्मक अवस्था र यसको व्यवस्थापकीय पक्षको गहिरो अध्ययन गरी भौतिक पूर्वाधार, जनशक्ति व्यवस्थापन, बजारको व्यवस्थापन र प्रतिफलको लेखाजोखा गर्नुपर्ने समय आएको छ ।’ 

गोरखापत्रको इतिहास जति गौरवशाली छ वर्तमान र भविष्यमा पनि त्यो प्रतिष्ठा कायम राख्नु सबैको चुनौतीको विषय भएको पनि उनको भनाई छ । 

उनले भनिन्, ‘आम मानिसमा विस्तार हुँदै गएको सूचनाको पहुँच र प्रवृत्तिको सहज प्रयोगबाट गोरखापत्रले पाठक वृद्धि गर्न सक्नुपर्छ । नेपालका अखबारे पत्रकारिता आरम्भ गरेको यस गोरखापत्रको इतिहास जति गौरवशाली छ वर्तमान र भविष्यमा पनि त्यो प्रतिष्ठा कायम राख्नु हामी सबैको चुनौतीको विषय पनि हो । बजारमा प्रतिस्पर्धी हुनु हाम्रो कर्तव्य छ । सँगसँगै अगुवा पत्रिकाको रूपमा स्थापित गर्न र आन्तरिक व्यवस्थापन सबल बनाउन पनि जरुरी छ । आर्थिक र जनशक्ति व्यवस्थापन दुवै हिसाबले आन्तरिक व्यवस्थापन सबल बनाउन सके गोरखापत्रको भविष्य उज्ज्वल छ ।’  





  • प्रकाशित मिति : वैशाख २४, २०८१ साेमबार ११:५६:४७

फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।



यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया