एमाले अध्यक्ष केपी शर्मा ओलीले नेकपा राष्ट्रिय एकता अभियानका अध्यक्ष वामदेव गौतमको एकताको भावनालाई आफूले सकारात्मक रुपमा लिएको बताएका छन् ।
ललितपुरको च्यासलस्थित पार्टी कार्यालयमा सोमबार आयोजित वरिष्ठ राजनीतिज्ञ सिद्धिनाथ ज्ञवाली स्मृति ग्रन्थ विमोचन कार्यक्रममा गौतमले आफू एमालेमा आत्मालोचनासहित फर्किन तयार रहेको बताएपछि अध्यक्ष ओलीले ‘चाहनालाई सकारात्मक रुपमा लिएको’ मात्रै बताए ।
‘वामदेव कमरेडले कतिपय कुरा उठाउनुभएको छ । अहिले छलफल गर्ने यो थलो उपयुक्त होइन,’ अध्यक्ष ओलीले भने, ‘त्यसमा प्रवेश गर्दिनँ । पछि छलफल गर्छौैं ।’ माओवादीसँग नजिक र आफ्नै दलको शीर्ष नेतृत्वसँगको मतभेदका कारण गौतम विगतमा एमालेबाट अलग भएका नेता हुन् ।
वामदेव गौतमलाई एमालेमा ‘फर्किन’ हतारो, ओलीलाई भने- पार्टी फुटाउँदिन शङ्का नगर्नू
गौतमले राखेको विचार सकारात्मक भएको उल्लेख गर्दै ओलीले भने, ‘वामदेवजीको अहिले एकताको जुन अभिव्यक्ति र भावना आएको छ, त्यो सकारात्मक एकताको भावना हो । यस भावनालाई अगाडि बढाऔँ, महाअभियान सफल होस् । मेरो शुभकामना छ ।’
ओलीले पार्टीले सही बाटो समातेको भन्दै नेतृत्वले गल्ती गरे सच्याएर अघि बढ्ने समेत चर्चा गरे । उनले एमालेलाई निर्णायक राष्ट्रिय शक्तिको रूपमा स्थापित गर्न गराउन वामपन्थीहरूलाई पार्टीमा आउन आह्वान गरे ।
तर, नेकपा एकता राष्ट्रिय अभियानका संयोजक गौतमले पार्टीमा आउन राखेको चाहनाबारे भने उनले उपयुक्त स्थानमा पछि छलफल गर्ने जवाफ दिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
