प्रधानन्यायाधीश चोलेन्द्र शमशेर जबराले निकास दिनुपर्ने पक्षमा १४ जना न्यायाधीश उभिएपछि सर्वोच्च अदालतमा तोकिएका सबै इजलास प्रभावित बनेका छन् ।
प्रधानन्यायाधीश जबराले आज सातवटा इजलास तोकेका थिए । जसमध्ये कुनै पनि इजलासमा तोकिएका रिटको सुनुवाइ भएन ।
न्यायाधीशहरू दीपककुमार कार्की, हरिप्रसाद फुयाँल, मीरा खड्का, कुमार रेग्मी, हरिकृष्ण कार्की, डा. मनोजकुमार शर्मा, विश्वम्भरप्रसाद श्रेष्ठ, टंकबहादुर मोक्तान, डा. आनन्दमोहन भट्टराई, प्रकाशकुमार ढुंगाना, प्रकाशमान सिंह राउत, सुष्मालता माथेमा र बमकुमार श्रेष्ठको इजलास विभिन्न मुद्दाको पेसी तोकिएको थियो ।
हुन त यसअघि नै प्रधानन्यायाधीश जबराले तोकेका इजलास बहिस्कार गर्ने उनीहरूको निर्णय थियो ।
जबरा स्वयंले पनि तत्कालीन प्रधानन्यायाधीश गोपालप्रसाद पराजुलीले विवादित भएपछि इजलास बहिष्कार गरेका थिए । आज उनै जबराले तोकेका इजलास १३ न्यायाधीशले बहिष्कार गरे ।
बहिष्कार गर्नेमध्येका अधिकांश न्यायाधीश बैठकमा छन् । प्रधानन्यायाधीशबारे थप धारणा बनाउन उनीहरू अढाइ घण्टादेखि बैठकमा जुटेका हुन् ।
यस्तै, प्रधानन्यायाधीश जबराले एक बजेका लागि फुलकोर्ट बोलाएका थिए । उक्त बैठक पनि प्रभावित भएको छ ।
न्यायाधीशहरू दीपककुमार कार्की, मीरा खडका, हरिकृष्ण कार्की, विश्वम्भर श्रेष्ठ, आनन्दमोहन भट्टराई, प्रकाशमान सिंह राउत, बमकुमार श्रेष्ठ, टंकबहादुर मोक्तान, प्रकाशकुमार ढुंगाना, सुष्मालता माथेमा, हरि फुयाँल, कुमार रेग्मी, डा.मनोजकुमार शर्मा र नहकुल सुवेदीले आइतबार बैठक बसेर फुलकोर्ट बैठकमा बस्न नसकिने निर्णय गरेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।