प्रधानमन्त्री कप राष्ट्रिय पुरुष टी-२० क्रिकेट प्रतियोगितामा साविक विजेता त्रिभुवन आर्मी क्लबले विजयी सुरुवात गरेको छ ।
आर्मीले समूह ‘बी’ अन्तर्गत कीर्तिपुरस्थित त्रिवि क्रिकेट मैदानमा सोमबार भएको पहिलो खेलमा कर्णाली प्रदेशमाथि ६३ रनको जित हात पारेको हो ।
११७ रनको विजयी लक्ष्य पछ्याएको कर्णालीले १४.४ ओभरमा सबै विकेट गुमाउँदै रन ५३ मात्र बनाउन सक्यो ।
कर्णालीका लागि अर्जुन घर्तीले सर्वाधिक १६ रनको योगदान दिए । कप्तान रविन्द्र शाहीले १५ रन बनाउँदा अन्य ब्याटरले दोहोरो अंकमा रन जोड्न सकेनन् ।
आर्मीका लागि जितेन्द्र मुखिया ४, सुशन भारी र साहब आलमले २-२ तथा सोमपाल कामी र विक्रम शोबले १-१ विकेट हात पारे ।
यसअघि टस हारेर ब्याटिङको निम्तो पाएको आर्मीले १९.१ ओभरमा सबै विकेट गुमाउँदै ११६ रन बनाएको थियो ।
आर्मीका लागि कप्तान विनोद भण्डारीले सर्वाधिक २९ रन को योगदान दिए । हरि चौहानले २० तथा रोहितकुमार पौडेलले र कुशल मल्लले १०-१० रन बनाउँदा अन्य ब्याटरले दोहोरो अंकमा रन बनाउन सकेनन् ।
कर्णालीका लागि प्रकाश जैशीले ३, अनुज चुनाराले २ तथा दिनेश अघिकारी, रविन्द्र शाही र राज शाहले १-१ विकेट हात पारे ।
यो जितसँगै आर्मीले २ अंक जोड्दा कर्णालीले हारबाट प्रतियोगिताको सुरुवात गरेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।