सत्ता साझेदार दल नेपाली कांग्रेसको केन्द्रीय कार्यसमितिको बैठकमा चुनावी गठबन्धनका विपक्षमा नेताहरू उभिएपछि सभापति शेरबहादुर देउवाले जितेर देखाउन चुनौती दिएका छन् । सानेपास्थित पार्टीको मुख्यालयमा शुक्रबार बसेको केन्द्रीय समितिको बैठकमा सभापति देउवाले चुनावी गठबन्धनको विरोध गर्ने नेताहरूलाई चुनाव जितेर देखाउन चुनौती दिएका हुन् ।
देउवाले गठबन्धनको पक्षमा बोल्दा शेखर कोइराला पक्षले त्यसको विरोध गरेको छ । आजको बैठकमा प्रदेश सभापतिहरूले आफ्ना धारणा राख्ने क्रममा चुनावी गठबन्धनबारे मिश्रित प्रतिक्रिया दिएका थिए । गठबन्धनको पक्षमा बोल्नेहरूले पनि केन्द्रबाट नभई स्थानीयस्तरबाट गठबन्धन गर्नुपर्ने धारणा राखेका थिए ।
बैठकमा गण्डकी प्रदेशका सभापति शुक्रराज शर्मा, कर्णाली प्रदेशका सभापति ललितजंग शाहीले नेता नैनसिंह महरले गठबन्धन गर्न नहुने धारणा राखे । नेता बलबहादुर केसीले चुनावमा गठबन्धन गर्नुअघि पार्टीभित्र एकता कायम राख्नुपर्ने बताएका थिए ।
चुनावी गठबन्धनको विरोधमा बोलेका नेताहरूलाई जवाफ दिँदै सभापति देउवाले भोलि जितेर देखाउनुपर्ला भन्दै रुलिङ गरेका थिए । उनले आफूलाई देशभरको अवस्थाबारे जानकारी रहेको पनि बताएको एक नेताले बताए । 'गठबन्धनमा विरोध गर्नुस् तर भोलि जितेर देखाउनु पर्ला,' उनले भनेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
