नेकपा (माओवादी केन्द्र)का सचिव तथा सांसद देवेन्द्र पौडेलले सरकारलाई सफल बनाउने दायित्व नेपाली कांग्रेसका महामन्त्री गगनकुमार थापाको पनि भएको भन्दै सरकारलाई सहयोग गर्न आग्रह गरेका छन् ।
आइतबार प्रतिनिधिसभा बैठकपछि सञ्चारकर्मीसँग कुराकानी गर्दै सचिव पौडेलले सरकारलाई सफल बनाउने जिम्मेवारी गठबन्धन दलका प्रमुख नेता थापाको पनि भएको बताए ।
थापाले सार्वजनिक मञ्चहरुबाट सरकारको आलोचना गरिरहेको भन्दै उनले आलोचनाले सरकार सफल नहुने बताए । सरकारको आलोचना नगरी सहयोग गर्न आग्रह गर्दै पौडेलले गठबन्धनलाई जोगाएर जनताको अपेक्षाअनुसारको काम गर्नुपर्ने बताए ।
सरकारका कमी, कमजोरीका बारेमा सल्लाह, सुझाव दिनुपरे प्रधानमन्त्रीलाई भेटेरै दिन पनि पौडेलले महामन्त्री थापालाई आग्रह गरे । उनले भने, ‘गगन थापा हाम्रो गठबन्धनको मुल पार्टीको प्रमुख व्यक्ति हुनुहुन्छ । सरकारलाई सफल बनाउने दायित्व उहाँको पनि हो । आलोचना गरेर मात्रै सफल हुन्न । सहयोग गरेर पनि सफल हुन्छ ।’
सचिव पौडेलले माओवादी घटकहरु छिटोभन्दा छिटो एकताबद्ध हुनुपर्ने बताए । एकताबद्ध हुन ढिलो गरे ढुंगा खाने स्थिति आउनसक्ने उनले उल्लेख गरे । माओवादी आन्दोलनलाई पुनःजीवित गर्नुको विकल्प नभएको उनको भनाइ छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
