नेपाली कांग्रेसका सांसद श्यामकुमार घिमिरेले प्रधानमन्त्री पुष्पकमल दाहाललाई प्रधानमन्त्री बनाउन आफूहरूको पनि भूमिका रहेको भन्दै सो भूमिकाको अवमूल्यन नगर्न चेतावनी दिएका छन् । शुक्रबार प्रतिनिधि सभा बैठकमा बजेटमाथिको छलफलमा बोल्दै सांसद घिमिरेले प्रधानमन्त्री दाहाललाई प्रधानमन्त्री बनाउन आफूहरूले दिएको मतको ख्याल गर्न आग्रह गरे ।

उनले भने, ‘तपाईँहरू पनि हामीजस्ता मान्छेहरू चुनाव जितेर आएको हुनाले मन्त्री हुनुभएको हो । प्रधानमन्त्री पनि हुनुभएको होला । तपाईँहरू एक्लै जितेको हुनाले आज यो स्थानमा पक्की पनि पुग्नुभएको होइन । त्यसैले आफ्नो क्षेत्रमा मात्रै बजेट खन्याएर भोलि आफू मात्रै जितेर आउने सोच पनि त्याग्न म अनुरोध गर्छु ।’

 उनले प्रधानमन्त्री दाहाल नेतृत्वको सरकारबाट अपेक्षा गरे अनुरूपको बजेट आउन नसकेको भन्दै असन्तुष्टि व्यक्त गरे । सांसदहरू आफ्नो निर्वाचन क्षेत्रमा बजेट विनियोजन गराउन मन्त्रालय कुद्दा कुद्दा जुत्ताको तलुवा खिए पनि हात लागि शून्य भएको बताए । उनले पार्टीको समर्थन पाएर मात्रै प्रधानमन्त्रीमा टिकिरहन्छु भन्ने नसोच्न प्रधानमन्त्री दाहाललाई चेतावनीसमेत दिए । उनले मुलुकको बजेटमा सांसदहरूको पनि अधिकार रहेको बताए ।

‘पचास घण्टा भाषण सुन्ने र पाँच मिनेट भाषण गर्ने । यत्ति हो हाम्रो काम । हामी यसैका लागि सांसद भएका रहेछौँ ? जनताको अपेक्षा के हामीसँग यति मात्रै हो ? बजेट विनियोजन गर्ने समयमा संघ र प्रदेशका मन्त्रालय कुद्दा कुद्दा जुत्ताका तलुवा खिए । हात लाग्यो शून्य । प्रधानमन्त्रीज्यू तपाईँलाई प्रधानमन्त्री बनाउन हाम्रा पनि मत जायर भएका छन्’, उनले भने, ‘तपाईँको सरकारबाट यस्तो अपेक्षा गरिएको थिएन । तपाईँलाई लागेको होला पार्टीको समर्थन पाएपछि पुग्छ । तर विगतको इतिहास हेर्नुभएकै छ । आफ्नै बहुमत सरकार असफल बनाइदिएको । पार्टी फुटेको । पार्टी भित्रै पनि चरम गुटबन्दी मौलाएको । हेक्का रहोस् यो त गठबन्धनको सरकार हो । स्मरण रहोस् जनप्रतिनिधिको हैसियतले यो मुलुकको बजेट माथि हाम्रो पनि अधिकार छ ।’ 

उनले आफ्नै पार्टीका नेताहरूमाथि पनि विभिन्न प्रश्न गरे । उनले यसैको लागि एउटा गठबन्धन तोडेर अर्को गठबन्धनमा छिरेको हो भनी प्रश्न गरे । उनले कांग्रेसलाई ठूलो पार्टी बनाउन आफूजस्ता सांसदहरूको पनि भूमिका भएको भन्दै यसरी पार्टी जोगाउन नसकिने बताए ।

उनले भने, ‘मेरो मेरा नेताहरूलाई भन्न चाहन्छु के यसैका लागि एउटा गठबन्धन तोडेर अर्को गठबन्धनभित्र हामी छिरेका थियौँ ? यसमा तपाईँहरूको भूमिका हुनुपर्दैन ? काँग्रेस सबैभन्दा ठूलो पार्टी हुनुमा हाम्रो पनि त भूमिका होला नि । तर पार्टी पनि जोगाउने हो भने अब यसरी काम चल्दैन । एउटा सानो कुराका लागि मन्त्रालयमा मन्त्री, सचिव, सह–सचिव, अधिकृतका पछाडि कुद्दा कुद्दा सांसदको जुत्ताको तलुवा खिइन्छ । स्वाभिमान भन्ने कतै रहँदैन । तर हातलागि सुन्ना । अब अति भयो मेरा पार्टीका नेताहरू पनि बोल्ने कि नबोल्ने ?’