स्वास्थ्य तथा जनसंख्या मन्त्रालयका सचिव डा. रोशन पोखरेलले डेंगु नियन्त्रणका लागि तीनवटै तहका सरकारको भूमिका महत्वपूर्ण हुने बताएका छन् ।  

स्वास्थ्य पत्रकार मञ्चद्वारा आयोजित ‘डेंगु महामारी र नियन्त्रणसम्बन्धी अन्तरक्रिया’मा सचिव पोखरेलले डेंगु नियन्त्रणका लागि ‘डेंगु बस्ने ठाउँ खोज र नष्ट गर’ अभियान सक्रियताका साथ सुरु गर्नुपर्ने बताए । 

तथ्यांकअनुसार सन् २०२३ को जुलाई ६ सम्म नेपालमा डेंगु संक्रमितको संख्या सात हजार सात सय ३३ पुगेको छ । जसमा डेंगु संक्रमण ७१ वटै जिल्लामा फैलिएको र हालसम्म यसको संक्रमणबाट सातजनाको मृत्यु भएको जानकारी दिए । उनले डेंगु संक्रमितको उपचार निःशुल्क भइरहेको बताए । 

स्वास्थ्य सेवा विभागका महानिर्देशक डा. दीपेन्द्रमान सिंहले डेंगु नियन्त्रणमा स्वास्थ्यसम्बन्धी साक्षरता बढाउनुपर्नेमा जोड दिए । ‘डेंगु नियन्त्रणका लागि सबैले आ–आफ्नो स्थानबाट स्वास्थ्यसम्बन्धी जनचेतना अभिवृद्धि गरी व्यक्ति, परिवार र समुदायको भूमिकालाई सशक्त बनाउन जरुरी छ,’ उनले भने । 

इपिडिमियोलोजी तथा रोग नियन्त्रण महाशाखाका निर्देशक डा. रुद्र मरासिनीले नेपालमा डेंगुको अवस्था, लामखुट्टे बस्ने र विकास हुने स्थान, डेंगु रोग रोकथाम, व्यवस्थापन तथा नियन्त्रणसम्बन्धी राष्ट्रिय निर्देशिका, हालसम्म भएका प्रमुख उपलब्धि, उपचार तथा व्यवस्थापनलगायतका विषयमाथि कार्यपत्र प्रस्तुत गरेका थिए । उनले ‘डेंगु नियन्त्रणः खोज र नष्ट गर अभियान’मा स्थानीय तहको जिम्मेवारी बढी रहेको बताए । 

सरुवारोग विशेषज्ञ डा. अनुप बास्तोलाले डेंगु नियन्त्रणमा ‘टायर हटाउ तथा लुकाउ’ अभियान गरी लामखुट्टे बस्ने र विकास हुने ठाउँमा सफाइ गर्नुपर्ने बताए । मञ्चका अध्यक्ष सरोज पोखरेलले स्वास्थ्य क्षेत्रको हकमा संघीयता प्रभावकारी नभएको बताउँदै डेंगु नियन्त्रणमा व्यक्ति स्वयंले सुरुवात गर्न आवश्यक रहेको बताए । 

विसं २०६१ मा पहिलोपटक डेंगुका बिरामी देखा परेपछि प्रत्येक वर्ष क्रमशः यस्ता संक्रमित बढ्दै गएको उनको भनाइ छ । 

नेपालमा सन् २०२२ मा ५४ हजार सात सय ८४ डेंगु संक्रमित पुष्टि भएका थिए । जसमध्ये कर्णाली प्रदेशमा छ सय ८२, मधेस प्रदेशमा एक हजार १८, सुदुरपश्चिम प्रदेशमा एक हजार तीन सय ५३, गण्डकी प्रदेशमा एक हजार नौ सय ५७, कोशी प्रदेशमा दुई हजार तीन सय नौ, लुम्बिनी प्रदेशमा पाँच हजार ३७ र बाग्मती प्रदेशमा ४२ हजार चार सय २८ डेंगु संक्रमित पुष्टि भएका थिए ।