फरकधार मिडिया प्रालिको अध्यक्ष तथा प्रबन्ध निर्देशकमा उद्धव बहादुर खड्का नियुक्त भएका छन् । आइतबार बसेको फरकधार मिडिया प्रालि सञ्चालक समितिको बैठकले खड्कालाई अध्यक्षमा नियुक्त गर्ने निर्णय गरेको हो ।
नवनियुक्त खड्कालाई फरकधार मिडियाका निर्देशक महेश शमशेर राणा र प्रधानसम्पादक सन्तोष आचार्यसहित फरकधार टिमले स्वागत गरेको थियो ।
नवनियुक्त अध्यक्ष खड्काले उपस्थित सबैलाई धन्यवाद दिँदै फरकधार मिडियालाई थप उचाइमा पुर्याउन भरपुर साथ सहयोग दिने बताए । उनले नेपाली मिडिया क्षेत्रलाई उद्योगको रूपमा विकास गर्नु आवश्यक रहेकाे बताए ।
‘मिडियालाई उद्योगका रूपमा विकास गर्नुपर्छ । अनि मात्र सही सूचना, सही समयमा, सबै नागरिकमाझ पुर्याउन सकिन्छ । देश, समाज र जनतालाई सुसूचित गर्ने प्लेटफर्मका रूपमा मिडिया हाउसलाई लिनुपर्छ,’ अध्यक्ष खड्काले भने ।
समाज र देशलाई योगदान गर्ने हेतुले आफू मिडिया क्षेत्रमा आबद्ध भएको अध्यक्ष खड्काले बताए । उनले देशको चौतर्फी विकासका लागि आफू हरबखत लागि पर्नेसमेत बताए ।
सन् २००२ फाइनान्स तथा मार्केटिङमा एमबीए (मास्टर इन बिजनेश स्टडिज) अध्ययन गरेका खड्काले अन्टरप्रेनरसिप इन ग्लोबल एजुकेसनमा विद्यावारिधि गरेका छन् । उनी करिब दुई दशकदेखि शिक्षा तथा शैक्षिक परामर्श क्षेत्रमा सक्रिय छन् ।
खड्का समाजसेवी पनि हुन् । विभिन्न राष्ट्रिय तथा अन्तर्राष्ट्रिय शैक्षिक क्षेत्रमा सक्रिय रहेका खड्का लायन्स क्लबलगायत विभिन्न सामाजिक संस्थाहरूमा आबद्ध रहेका छन् ।
उनी हब ग्रुप अफ कम्पनिजको अध्यक्ष पनि हुन् । हब ग्रुप अफ कम्पनिज अन्तर्गत हब इन्टरनेशनल एजुकेसन, ट्रेडिङ हब, ट्राभलर्स हब र हब प्राफेशनल सर्भिसेस रहेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।