गैरआवासीय नेपाली संघ (एनआरएनए)को आरके शर्मा पक्षले संघको नाममा रहेका विभिन्न बैंकको खाता रोक्काका लागि निवेदन दिएको छ ।
आधिकारिकता विवादपछि शर्मा पक्षले ११ औँ महाधिवेशनअघि कोषाध्यक्षको भूमिकामा रहेका लोक दाहाल र सुनिल साहमार्फत शर्माले विभिन्न बैंकमा रहेका १८ वटा खाता बन्द गर्न निवेदन दिएका हुन् ।
शर्मा पक्षका महासचिव बुद्धि सुवेदीका अनुसार ती बैंकमा पत्राचार भएको छ भने यसबारे परराष्ट्र र संघका प्रमुख कार्यकारी अधिकारी अधिकृत (सिइओ) राजेन्द्र कुमार राउतलाई पनि जानकारी गराइएको छ ।
आइतबार अध्यक्ष शर्मासहितका पदाधिकारी बालुवाटारस्थित संघको कार्यालयमा पुगेका थिए । तर, अध्यक्षको कोठा बन्द गरिएका कारण शर्माले नियमित कार्यसञ्चालन गर्न पाएनन् ।
त्यसपछि शर्माले सिइओसहितका कर्मचारीसँग छलफल गरेर संघको नाममा रहेका कुनै पनि बैंक खाताबाट तत्काल आर्थिक कारोबार नगर्न र कार्यालयको साँचो जिम्मा लगाउन आग्रह गरेका थिए ।
पुरानो समितिले संघको सम्पूर्ण तालाचाबी निर्वाचन समितिले अध्यक्ष घोषणा गरेका डा. बद्री केसीलाई बुझाइसकेको छ ।
शर्माले नेतृत्वको एनआरएनए आइसिसीले आधिकारिकताको दाबी गर्दै शुक्रबारै परराष्ट्र मन्त्रालयमा निवेदन दिएको थियो । आइतबार शर्मासहितका पदाधिकारीले परराष्ट्रमा पुगेर आधिकारिकताका लागि आवश्यक कागजात पेस गरेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
