इजराइलमाथिको हमलामा हमासद्वारा बन्धक बनाइएका २२ थाई नागरिकका बारेमा कुराकानी गर्न मंगलबार थाइल्यान्डका विदेशमन्त्री पर्णप्री बहिद्धा–नुकाराले कतार र इजिप्टको आकस्मिक भ्रमण गरेका छन् ।
इजराइली अधिकारीहरूका अनुसार ७ अक्टोबरमा गाजापट्टीबाट हमासले इजराइमा गरेको आक्रमणमा अधिकांश सर्वसाधारणसहित एक हजार ४ सयभन्दा बढी मानिस मारिएका छन् ।
जवाफमा इजराइली सेनाले गाजामा हमला गरेको छ । हमलामा ३ हजारभन्दा बढी बालबालिकासहित ८ हजार ३ सय मानिस मारिएको हमास नियन्त्रित स्वास्थ्य मन्त्रालयले जनाएको छ ।
पछिल्लो तथ्याङ्कअनुसार गाजामा हमासले २ सय ३० जनालाई बन्धक बनाएको छ । थाई विदेशमन्त्रालयका अनुसार तीमध्ये २२ जना थाई नागरिक छन् । प्रधानमन्त्री श्रेथा थाभिसिनले सोमबार थाई नागरिकहरूलाई स्वदेश फर्काउन कडा मिहिनेत गरिरहेको बताएका छन् । उनले बुधबार इजिप्टका विदेशमन्त्रीसँग कुराकानी गर्नुअघि मंगलबार कतारका प्रधानमन्त्री र विदेशमन्त्रीसँग भेट्नका लागि विदेशमन्त्री पर्णप्रीलाई कतार पठाएका छन् ।
पर्णप्रीले इजराइल र गाजामा जारी हिंसाका कारण बन्धक बनाइएका थाई नागरिकको स्थितिका बारे कुराकानी गर्ने विदेश मन्त्रालयले एक विज्ञप्तिमा उल्लेख गरेको छ ।
द्वन्द्व सुरु हुँदा इजराइलमा करिब ३० हजार थाईले काम गरिरहेका थिए । तीमध्ये अधिकांश कृषि क्षेत्रमा संलग्न थिए । मन्त्रालयलका अनुसार द्वन्द्वमा कम्तीमा ३२ थाई नागरिकको मृत्यु र १९ जना घाइते भएका छन् ।
‘हामी युद्धका पीडितहरू जस्तै छौँ’, छिमेकी मुलुक लाओसको भ्रमण गर्नुअघि सोमबार प्रधानमन्त्री श्रेथाले पत्रकारसँग भने, ‘इजराइलमा अन्य देशको तुलनमा थाई नागरिक धेरै भएकाले हामी सबैभन्दा बढी प्रभावित भएका छौँ ।’
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
