नेकपा एमालेका वरिष्ठ उपाध्यक्ष ईश्वर पोखरेलले वर्ष २०८० मा मुलुकमा राजनीतिक अस्थिरताका कारणले आर्थिक विकास र समृद्धिमा बाधा पुगेको बताएका छन् ।
शुक्रबार राष्ट्रिय जनसांस्कृतिक महासंघ नेपालद्वारा आयोजित शुभकामना सांस्कृतिक साँझ, २०८० समारोहलाई सम्बोधन गर्दै पोखरेलले बितेको वर्षमा मुलुकलाई जागृत बनाउने कुराहरुलाई मुर्छित बनाउने काम गरिएको टिप्पणी गरे ।
‘बितेको वर्ष खासगरी समस्या र चुनौतीले भरियो । मुलुकमा राजनीतिक अस्थिरताका कारणले आर्थिक विकास र समृद्धिमा वाधा पुग्यो । राष्ट्रियता र स्वाभिमानका विषयहरूमा हामीले बेला बेलामा कमजोरी देखायौँ । बेला बेलामा देश लाई जागृत बनाउने कुराहरूलाई मुर्छित बनाउने काम भयो,’ पोखरेलले भने ।
गत वर्षबाट पाठ सिकेर अगामी दिनमा त्यस्ता किसिमका कमजोरी आउन नदिने कुरामा जोड दिनुपर्ने पोखरेलको भनाइ छ ।
उनले राजनीतिक दल र समाजमा विकृतिहरू फैलिएको उल्लेख गर्दै त्यसलाई निर्मूल पार्न सांस्कृतिक दलहरूले विकृतिका विरुद्ध धावा बोल्नु आजको आवश्यकता भएको औंल्याए ।
सांस्कृतिकरूपमा समाज विचलित भइरहेको उल्लेख गर्दै पोखरेलले यसरी मुलुकलाई कमजोर हुनबाट जोगाउन नसकिने बताए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
